Ladki Bahin Yojana: ...तर त्यांच्याविरोधात तक्रार करा, लाडकी बहीण योजनेबाबतच्या अफवांवर मुनगंटीवार यांचे मोठे वक्तव्य

महायुती सरकारने सुरू केलेली लाडकी बहीण योजनेला राज्यभरातून खूप चांगला प्रतिसाद मिळत आहे. विधानसभा निवडणुकीमध्ये महायुतीला लाडकी बहीण योजनेचा चांगला फायदा झाला. ही योजना महायुतीसाठी कलाटणी देणारी ठरली. या योजनेच्या माध्यमातून महिलांना दरमहा १५०० रुपये दिले जात आहेत.

या योजनेअंतर्गत आतापर्यंत महिलांना सहा हप्त्याचे पैसे मिळाले. आता निवडणुका झाल्यानंतर पुन्हा महायुतीचे सरकार आले आहे त्यामुळे डिसेंबर महिन्याच्या हफ्त्याचे पैसे कधी येणार याची लाडक्या बहिणी वाट पाहत आहेत. याबाबत भाजपचे नेते सुधीर मुनगंटीवार यांनी मोठं विधान केले आहे.

सुधीर मुनगंटीवार यांनी लाडकी बहीण योजनेबाबत बोलताना सांगितले की, 'लाडकी बहीण योजनांचे पैसे लवकरच त्याच्या खात्यात जमा होणार आहे. या संदर्भात माझे अजित पवार यांच्याशी बोलणे झाले आहे. ही योजना कुठेही बंद पडणार नाही. या विरोधात काँग्रेस पक्ष कुठे चुकीच्या पद्धतीने प्रचार करत असतील तर त्यांच्या विरोधात पोलिसात तक्रार दाखल करा.'

लाडकी बहीण योजनेच्या निकषामध्ये आणि पात्रामध्ये बदल होणार असल्याची चर्चा गेल्या काही दिवसांपासून सुरू आहे. याबद्दल बोलताना सुधीर मुनगंटीवार यांनी सांगितले की, 'पात्रता आणि निकषांत बदल होणार नाहीत. अफवा पसरवल्या आहेत. विधानसभेत झटका बसलेले जिल्हा परिषदेत काय होईल याच्या भीतीत आहेत.' असा टोला सुधीर मुनगंटीवार यांनी विरोधकांना लगावला आहे.

तसंच, 'नागपूर अधिवेशनात यावर कुणी प्रश्न विचारणार नाही. कुणी विचारलंच तर आम्ही काँग्रेसची भूमिका काय ते विधानसभेच्या व्यासपीठावरून सांगू.', असा इशारा देखील सुधीर मुनगंटीवार यांनी काँग्रेसला दिला आहे. दरम्यान, विधानसभा निवडणुकीमध्ये लाडकी बहीण योजनेमुळे महायुतीला खूप चांगला फायदा झाल्या. या योजनेमुळे लाडक्या बहिणींनी महायुतीला भरभरून मतं दिली. या योजनेला राज्यभरातील महिलांकडून खूप चांगला प्रतिसाद मिळाला. आता या योजनेअंतर्गत लाडक्या बहिणींना २१०० रुपये हफ्ता दिला जाईल असे सांगितले जात आहे.