Kolhapur Politics: शरद पवारांनी पकडला शाहू महाराजांचा हात; मविआच्या आंदोलनात चालले साथ-साथ

राजकोट किल्ल्यावरील छत्रपती शिवरायांचा पुतळा आठ महिन्यात कोसळला आणि राज्यात संतापाची लाट उसळली. याच संतापाला वाट मोकळी करून देण्यासाठी महाविकास आघाडीने जोडे मारो आंदोलन केलं. या आंदोलनात शरद पवार आणि शाहू महाराजही सहभागी झाले. मात्र दोघांच्या एका कृतीनं सगळयांचंच लक्ष वेधून घेतलं.

याच शाहू महाराज आणि शरद पवार चक्क हातात हात घालून चालताना दिसतायेत. शरद पवार आणि शाहू महाराज हे जुने मित्र. मात्र शाहू महाराज राजकारणात सक्रिय नसले तरी सामाजिक कार्याचा धडाका सुरूच होता. त्यामुळे शाहूंना राजकारणात सक्रीय करून कोल्हापूर जिंकण्यासाठी पवारांनी डावपेच आखले आणि कोल्हापुरात वातावरण फिरलं. त्यातूनच शाहू महाराज कोल्हापूरचे खासदार बनल्याची चर्चा रंगलीय.

कोल्हापूरच्या राजकारणात काय घडलं?

26 ऑगस्ट 2023 ला पवारांनी शाहूंची भेट घेत त्यांच्या उमेदवारीचे संकेत दिले

शाहू महाराज उमेदवारीबाबत इच्छूक नव्हते

20 फेब्रुवारी 2024ला पुन्हा भेट घेऊन उमेदवारीसाठी मनधरणी

शाहू छत्रपती उमेदवारीस तयार झाल्यानंतर जागा सोडण्याबाबत पवारांकडून ठाकरेंची मनधरणी

शाहू महाराजांच्या विजयासाठी पवारांची कोल्हापूरात सभा

शाहू महाराजांच्या उमेदवारीपासून त्यांच्या विजयापर्यंत शरद पवारांचा मोठा हात असल्याचं बोललं जातंय. लोकसभा निवडणूकीवेळी शरद पवारांनी शाहू छत्रपतींचा हात हाती घेतला आणि लोकसभा जिंकली. त्यामुळे आता विधानसभेला कोल्हापुरात कोणता इतिहास घडणार? शरद पवार महायुतीला धोबीपछाड देणार की महायुती मविआचा डाव उलटवणार? याकडे सर्वांचं लक्ष लागलंय.