Kalyan : घरावरील झाड हटवायला वीज खंडीत करण्यासाठी पैशांची मागणी; महिलेचा महावितरण कर्मचाऱ्यावर आरोप

अभिजित देशमुख 
कल्याण : ग्राहकांची अरेरावी करण्यासाठी कायम चर्चेत असलेले महावितरणचे कर्मचारी पुन्हा वादात सापडले आहेत. कल्याण येथे पत्री पूल परिसरात एका गरोदर महिलेचा जीव अक्षरशः टांगणीला लागला आहे. या महिलेच्या घरावर मागील काही दिवसांपासून एक झाड झुकलेले आहे. हे झाड हटविण्यासाठी वीज पुरवठा खंडित करणे गरजेचे आहे. मात्र यासाठी महावितरण कर्मचाऱ्यांकडून पैशांची मागणी होत असल्याचा आरोप सदर महिलेने केला आहे. 

कल्याणमधील पत्री पूल परिसरात असलेल्या सदर पीडित गरोदर महिलेने स्वतः व्हॉइस रेकॉर्डिंगद्वारे हे प्रकरण उजेडात आणले आहे. तिच्या म्हणण्यानुसार, विज खंडित करून झाड हटवण्याच्या कामासाठी एमएसईबी कर्मचाऱ्याला ५ हजार रुपये दिले. तरीही संबंधित अधिकाऱ्यांनी झाड कापण्यासाठी २५ हजार रुपये लागतील, अशी मागणी करत टाळाटाळ केली आहे. यामुळे साधे काम करण्यासाठी देखील पैसे द्यावे लागत असल्याचा प्रकार समोर आला आहे. 

नागरिक पोहचले महावितरण कार्यालयात 

दरम्यान, ही बाब समजताच स्थानिक नागरिकांनी महावितरणच्या कल्याणमधील टाटा पॉवर कार्यालयात पोहोचले. घटनेची चौकशी करताना व्हिडिओ रेकॉर्डिंग सुरू केले. मात्र त्यांना कर्मचाऱ्यांकडून व्हिडिओ थांबवण्याची जबरदस्ती तसेच व्हिडिओ का काढताय, पोलिसांना बोलावतो अशा धमक्या दिल्या. 

त्या कर्मचाऱ्यांच्या निलंबनाची मागणी 

मात्र सदरच्या या प्रकरणामुळे महावितरण कर्मचारी अधिकाऱ्यांचा मनमानी कारभार पुन्हा एकदा चव्हाट्यावर आला आहे. या प्रकाराबाबत स्थानिक नागरिकांनी तीव्र संताप व्यक्त केला असून एका गरोदर महिलेच्या सुरक्षिततेशी खेळ करून पैसे कमावण्याचा प्रकार अत्यंत निषेधार्ह असल्याचे म्हटले आहे. तसेच दोषी महावितरण अधिकाऱ्यांवर तात्काळ निलंबन करून त्यांची चौकशी करण्याची मागणी केली आहे.