Shocking : संतापजनक! शिक्षकाने १४ वर्षीय विद्यार्थिनीकडे प्रायव्हेट फोटो मागितले; ब्लॅकमेल करत बलात्कार केला

अक्षय शिंदे, जालना

Jalna 14 Years Girl Student Rape By Teacher आई वडिलांसारखेच शिक्षक देखील मुलांच्या भविष्याची जडणघडण करत असतात. मात्र या शिक्षकी पेशातील एका राक्षसाचा क्रूर चेहरा जालन्यातील एका घटनेतून समोर आला आहे. एका खासगी शाळेच्या शिक्षकाने १४ वर्षीय विद्यार्थिनीवर दबाव टाकत तिच्याकडून प्रायव्हेट फोटोंची मागणी केली. इतकेच नाही तर, या शिक्षकाने त्याच फोटोंचा वापर करून विद्यार्थीनीला ब्लॅकमेल करून तिच्यावर बलात्कार केला. याप्रकरणी शिक्षकावर पोक्सो अंतर्गत गुन्हा दाखल करण्यात आला आहे.या घटनेनंतर मुली विद्येच्या मंदिरात देखील सुरक्षित नाहीत का? असा प्रश्न उपस्थित केला जात आहे.

मिळालेल्या माहितीनुसार, जालना शहरातील एका नामंकित खासगी शाळेतील शिक्षकाने १४ वर्षीय विद्यार्थिनीला शिकवण्याच्या बहाण्याने तिच्याकडे तिचे प्रायव्हेट फोटो मागितले. सुरुवातीला विद्यार्थिनीने या मागणीला विरोध केला. मात्र आरोपीने तिच्यावर दबाव टाकून तिचे प्राव्हेट फोटो मिळवले. या फोटोंच्या आधारे आरोपी विद्यार्थिनीला ब्लॅकमेल करत असल्याचे तक्रारीत म्हटले आहे.

या फोटोंच्या आधारे आरोपी शिक्षकाने विद्यार्थिनीवर वारंवार अत्याचार केले. हा शिक्षक एक वर्षापासून सोशल मीडियाच्या माध्यमातून या विद्यार्थिनीच्या संपर्कात असल्याची माहिती आहे. दरम्यान पीडितेने सततच्या त्रासाला कंटाळून घडलेल्या घटनेबाबत कुटुंबियांना माहिती दिली. कुटुंबीयांनी तातडीने कदीम जालना पोलीस ठाणे गाठत पोलीस ठाण्यात तक्रार दाखल केली.

तक्रार दाखल झाल्यानंतर काही तासांमध्ये पोलिसांनी तपासाची चक्रे वेगाने फिरवत संबंधित संशयित आरोपी शिक्षक विक्की शिंदे याला कदीम जालना पोलिसांनी अटक केली आहे. याप्रकरणी पुढील तपास कदीम जालना पोलीस (Jalna Kadim Police) करत आहे. या घटनेने परिसरात खळबळ उडाली असून पालकांनी आणि स्थानिक नागरिकांनी संताप व्यक्त केला आहे. या घटनेनंतर शाळेसारख्या ठिकाणी देखील मुली सुरक्षित नाहीत हे आढळून आलं आहे. आता या शिक्षकावर काय कारवाई होणार? हे पाहणं महत्त्वाचं ठरेल.