Parola News : पैसे काढण्यासाठी बँकेत गेलेल्या शेतकऱ्याला लुबाडले; पिशवीतील एक लाख घेऊन चोरटे फरार

पारोळा (जळगाव) : शेतातील मक्याचे उत्पादन आल्यानंतर त्याची रक्कम बँकेत ठेवली होती. यातील एक लाख रुपयांची रक्कम शेतकऱ्याने पारोळा शहरातील आयसीआयसीआय बँकेतुन काढली. हि रक्कम पिशवीत ठेवल्यानंतर पिशवीमधील एक लाख रुपये चोरून चोरटे फरार झाले. याप्रकरणी चोरट्यांविरुद्ध येथील पोलिस ठाण्यात गुन्हा दाखल करण्यात आला आहे.

पारोळा (Parola News) तालुक्यातील वाघरे येथील शेतकरी नीलेश विजय पाटील यांनी चुलत भावाकडून उसनवार एक लाख रुपये भारतीय स्टेट बँकेत मागवले होते, ते काढून ते जवळच असलेल्या आयसीआयसीआय बँकेत मका विक्रीतून आलेले पैसे काढण्यासाठी गेले. मात्र, ते बँकेत पैसे काढण्याचे काम करीत असताना एक लाख रुपये त्यांनी त्यांच्या पिशवीमध्ये ठेवले व पिशवी त्यांच्या वडिलांजवळ दिली. ते बँकेत (Bank) बसले असताना चोरट्यांनी पिशवीला ब्लेडच्या साह्याने कापून पिशवीमधील एक लाख रुपये लंपास केले. 

कर्ज फेडण्यासाठी काढत होते रक्कम 

हा प्रकार लक्षात आल्यानंतर याबाबत पारोळा पोलिस ठाण्यात अज्ञात चोरट्यांविरुद्ध गुन्हा दाखल करण्यात आला आहे. नीलेश पाटील यांच्यावर हात उसनवारी कर्ज असल्याने ते स्टेट बँकेतून एक लाख रुपये व आयसीआयसीआय बँकेतून मका विक्रीचे पैसे काढून कर्ज फेडणार होते. त्याआधीच चोरट्याने एक लाखावर डल्ला मारला. बँकेतून रक्कम काढली नसल्याने ते पैसे सुरक्षित आहेत. याबाबत सीसीटीव्ही कॅमेऱ्यामध्ये चोरटे कैद झाले आहेत.