Parola News : पळासखेडे सिम परिसरात रानडुकरांचा धुमाकूळ; हल्‍ल्‍यात शेतकरी जखमी

पारोळा (जळगाव) : पळासखेडे सिम (ता. पारोळा) येथे गेल्या अनेक दिवसांपासून रानडुकरांचा धुमाकूळ सुरू आहे. शेतकऱ्यांनी याबाबत वन विभागाला (Forest Department) माहिती दिली होती. तरी देखील याकडे (Parola) दुर्लक्ष झाल्याने १३ जुलैला शेतात काम करताना शेतकऱ्यास मागून हल्‍ला केल्‍याने शेतकरी जखमी झाला आहे. (Tajya Batmya)

पळासखेडे सिम (ता. पारोळा) येथील शेतकरी दिनकर शिवाजी पाटील व त्यांची पत्नी दिनकर पाटील हे दोघेजण त्यांच्या शेतामध्ये कपाशी निंदनीचे काम करत होते. या दरम्‍यान त्यांच्या मागून रानडुक्कर येऊन त्याने शेतकरी दिनकर पाटील यांना जबर धडक दिली. यात सदर शेतकरी हे दगडावरती पडल्याने त्यांच्या डोक्यावर व डोळ्याला इजा झाली. सदर घटनेची माहिती कळताच ग्रामस्थांनी शेतकऱ्यास रुग्णालयात उपचारासाठी नेले.

बंदोबस्त करावा अशी मागणी

दरम्यान शेतीचे दिवस सुरू झाल्याने रानडुकरांचा धुमाकूळ वाढत असल्यामुळे शेतीची कामे करावे की जीव वाचवावा अशी अवस्था शेतकऱ्यांची झाली आहे. शिवाय रानडुक्कर शेती पिकांचे नुकसान करत आहेत. याबाबत वन विभागाने योग्य ती दखल घेऊन रानडुकरांचा बंदोबस्त करावा अशी मागणी होत आहे.