Leopard Attack: थरारक..बिबट्याच्‍या जबड्यातून सुटला; सरपण गोळा करायला गेला असता हल्‍ला

जळगाव : तालुक्यातील मन्यारखेडा शिवारात भावासोबत सरपण गोळा करण्यासाठी गेलेल्या तरुणावर बिबट्याने अचानक हल्ला (Leopard Attack) चढविला. मात्र, तरुणाने प्रसंगावधान राखल्याने त्याचे प्राण वाचले. दबा धरून बसलेल्या बिबट्या मान जबड्यात घेणार इतक्यात पूर्ण ताकदीने तरुणाने बिबट्याला अंगावरूनच (Jalgaon News) बाजूला फेकल्याने अनर्थ टळला. आरडाओरड झाल्यामुळे बिबट्याने जंगलात पळ काढला. (Live Marathi News)

मन्यारखेडा (ता.जळगाव) येथील मदन सुखदेव अहिरे (वय २५) मोठा भाऊ राजेंद्र सुकदेव अहिरे (२८) याच्यासोबत गावापासून दोन किलोमीटर अंतरावरील रानात सरपण गोळा करण्यासाठी रविवारी (ता. ३०) गेला. दोन्ही भाऊ सरपण गोळा करीत असताना, राजेंद्र थोडा पुढे होता, तर मदन मागे राहून लाकडे गोळा करीत होता. अचानक झुडपात दबा धरून बसलेल्या बिबट्याने मदनवर हल्ला केला. मात्र, मदनला नेमके काय झाले, हे कळाले नाही. मात्र, मानेवर दोघे पंजे आणि जबड्यात बिबट्या मान धरणार नेमक्या त्याच क्षणाला मदनने बिबट्याचे दोन्ही पंजे मानेपासून वेगळे करून त्याला पटकले.

भावाची धाव

रक्तबंबाळ झाल्यावर मदनच्या मदतीला भाऊ धावून आला, म्हणून बिबट्या जंगलात पळून गेला. भाऊ राजेंद्रने जखमी मदनला नागरिकांच्या मदतीने शासकीय वैद्यकीय महाविद्यालय व रुग्णालयात आणले. मदनच्या कुटुंबियांनी रुग्णालयात गर्दी केली होती. बिबट्याच्या हल्ल्यामुळे ग्रामस्थांमध्ये भीती पसरली आहे. बिबट्याचा बंदोबस्त करण्याची मागणी ग्रामस्थांनी केली आहे.