Jalgaon Municipal Election Result: भाजपनंतर राष्ट्रवादीनं उघडलं विजयाचं खातं; बंडखोर उमेदवाराचा दारूण पराभव

जळगाव महानगरपालिका निवडणूक निकाल जाहीर होत असून भाजप आणि राष्ट्रवादीनं पहिल्या विजयाचं खातं उघडलंय. जळगावमध्ये प्रभाग क्रमांक 19 मधून भाजपने आपल पहिलं खातं उघडलं आहे. राजेंद्र घुगे पाटील विजयी झालेत. दुसरकडे अजित पवार गटाचे उमेदवार प्रफुल्ल देवकर यांनी पहिल्याच निवडणुकीत बाजी मारलीय.

प्रफुल्ल देवकर हे राष्ट्रवादी अजित पवार गटाचे माजी मंत्री गुलाबराव देवकर यांचे चिरंजीव आहेत. प्रफुल्ल देवकर यांनी 1096 मतांनी विजय मिळवलाय. तर भाजपचे राजेंद्र घुगे पाटील हे 19 मधून विजयी झालेत. राजेंद्र घुगे पाटील यांनी गेल्या पंचवार्षिकमध्ये स्थायी समिती सभापती म्हणून त्यांनी पदभार सांभाळलाय. आता त्यांची ही दुसरी टर्म आहे, त्यात ते विजयी झालेत.

जळगाव महापालिकेच्या 63 जागांसाठी गुरुवारी मतदान झालं. एकूण 75 जागांपैकी 12 जागा बिनविरोध आल्या आहेत. एकूण 63 जागांसाठी 321 उमेदवार निवडणूक रिंगणात आहेत. महापालिकेत सत्ता स्थापन कोण करणार हे संपूर्ण निकालानंतर समोर येईल, मात्र भाजप आणि राष्ट्रवादी अजित पवार गटानं येथे विजयाचे खाते उघडलंय. जळगाव महापालिकेच्या निवडणुकीत महायुतीतील भाजप, शिवसेना, अजित पवार गट हे तिन्ही पक्ष एकत्र होते. त्यांची लढत ठाकरे गट आणि राष्ट्रवादी काँग्रेस शरदचंद्र पवार पक्षाशी होती.

जळगाव महापालिकेचा निकाल लागण्याआधी साम टीव्हीनं जाहीर केलेल्या एक्झिट पोलमध्ये महायुतीचा विजय होण्याचा अंदाज वर्तवण्यात आलाय. येथे भाजप, शिंदे सेना आणि राष्ट्रवादी यांनी महायुती म्हणून निवडणूक लढवली होती. निकालामध्ये भाजप हा मोठा भाऊ ठरेल. तर शिंदेसेना १९ जागांसह धाकटा भाऊ ठरणार असल्याचा दावा एक्झिट पोलमध्ये करण्यात आला होता. दरम्यान येथे राज्याचे ग्रामविकास मंत्री गिरीश महाजन यांची प्रतिष्ठा पणाला लागलीय. कारण येथे त्यांचे अत्यंत विश्वासू, स्वीय सहाय्यक व आरोग्यदूत म्हणून ओळखले जाणारे अरविंद देशमुख यांना १५ ब मधून उमेदवारी देण्यात आलीय.