Jalgaon News: विजेचा शॉक लागून युवकाचा मृत्यू; वाचवायला गेलेला भाऊही जखमी

कुऱ्हा काकोडा (जळगाव) : शेतात काम करीत असताना विजेचा शॉक (Electric Shock) लागून १७ वर्षीय विद्यार्थ्याचा दुर्दैवी मृत्यू झाल्याची घटना पारंबी (ता. मुक्ताईनगर) गावात घडली. या घटनेमुळे गावात (Muktainagar) हळहळ व्यक्त होत आहे. या घटनेत शॉक लागलेल्या विद्यार्थ्याला वाचवताना त्याचा मोठा भाऊ जखमी झाला आहे. (Latest Marathi News)

पारंबी (ता. मुक्ताईनगर) येथील शेतकरी संतोष झांबरे यांना दोन मुले असून मोठा चेतन हा जळगाव येथे शिकतो. तर लहान गौरव हा नुकताच दहावीची परीक्षा ८३ टक्क्यांनी उत्तीर्ण होऊन त्याने अकरावीत प्रवेश घेतलेला होता. गौरव हा शाळेत जाण्यापूर्वी शेतातून येतो असे सांगून आपल्या मोठ्या भावासोबत १ जुलैला सकाळी शेतात गेला. त्या ठिकाणी गौरवला विजेच्या वायरचा जबर शॉक लागल्याने तो वायरला चिटकला. त्याला वाचविण्यासाठी त्याचा मोठा भाऊ चेतन गेला असता, तो जोराने फेकला जाऊन गंभीररित्या जखमी झाला.

आईचा आक्रोश

घटना घडताच आजूबाजूचे शेतकरी धावून आले. मात्र, तोपर्यंत निपचित पडलेला होता. आपल्या मुलाला अशा अवस्थेत पाहताच त्याच्या आईने एकच आक्रोश केला. दोन्ही भावडांना तत्काळ प्राथमिक आरोग्य केंद्रात नेले असता, पुढील उपचारार्थ मलकापूरला पाठवण्यात आले. तेथे गौरवला डॉक्टरांनी मृत घोषित केले.