जळगाव हादरले! शाळा परिसरातच दहावीच्या विद्यार्थ्यावर चॉपरने सपासप वार; जुन्या वादातून जीवघेणा हल्ला

संजय महाजन, साम टीव्ही

जळगाव शहरातील अयोध्या नगर परिसरातून एक अत्यंत धक्कादायक आणि संतापजनक बातमी समोर आली आहे. शाळा परिसरातच शाळकरी विद्यार्थ्यांमधील वादाचे हिंसक रूप पाहायला मिळाले असून, दहावीत शिकणाऱ्या एका अल्पवयीन विद्यार्थ्यावर त्याच्याच वर्गातील दुसऱ्या अल्पवयीन विद्यार्थ्याने चॉपरने प्राणघातक हल्ला केला आहे.

दोन दिवसांपूर्वी झालेल्या जुन्या वादाच्या रागातून एका दहावीतील विद्यार्थ्यावर चॉपरने सपासप वार करून गंभीर जखमी केल्याची खळबळजनक घटना अयोध्या नगरातील एका शाळेजवळ घडली आहे. जखमी झालेला विद्यार्थी हा कुसुंबा येथील रहिवासी आहे.

शाळेतील दोन अल्पवयीन विद्यार्थ्यांमध्ये दोन दिवसांपूर्वी काही कारणावरून वाद झाला होता. याच वादाचा राग मनात धरून दुसऱ्या विद्यार्थ्याने संधी साधत अयोध्या नगर परिसरातील एका शाळेजवळच पीडित विद्यार्थ्याला गाठले आणि त्याच्यावर धारदार चॉपरने हल्ला केला. या हल्ल्यात विद्यार्थ्याच्या बरगडीजवळ गंभीर दुखापत झाली आहे. घटनेनंतर परिसरात एकच घबराट पसरली. गंभीर जखमी झालेल्या विद्यार्थ्याला तातडीने उपचारासाठी शासकीय वैद्यकीय महाविद्यालय व रुग्णालय (GMC) येथे दाखल करण्यात आले असून, त्याच्यावर उपचार सुरू आहेत.

या घटनेनंतर जखमी विद्यार्थ्याच्या पालकांनी तीव्र संताप व्यक्त केला असून पोलीस प्रशासनाकडे तक्रार नोंदवली आहे. आपल्या मुलावर जीवघेणा हल्ला करणाऱ्या दोषीवर लवकरात लवकर आणि कठोर कायदेशीर कारवाई करण्यात यावी, अशी मागणी पालकांनी केली आहे. घटनेचे गांभीर्य ओळखून पोलिसांनी तातडीने तपासाची चक्रे फिरवली असून घटनास्थळावरील तसेच परिसरातील सीसीटीव्ही कॅमेऱ्यांचे फूटेज तपासण्याचे काम वेगाने सुरू आहे.