राज्याचे उपमुख्यमंत्री आणि राष्ट्रवादी काँग्रेसचे ज्येष्ठ नेते अजित पवार यांचे आज, बुधवारी बारामतीत विमान अपघातात निधन झाले. सकाळी पावणेनऊच्या सुमारास ही दुर्घटना घडली. अजित पवारांच्या निधनानं महाराष्ट्रावर शोककळा पसरली. पवार कुटुंबावर दुःखाचा डोंगर कोसळला. अजित पवार यांच्या पत्नी सुनेत्रा पवार, बहीण सुप्रिया सुळे या दिल्लीत होत्या. त्या तातडीने बारामतीकडे रवाना झाल्या. अजित पवार यांचे काका आणि ज्येष्ठ नेते शरद पवार हे तातडीने हेलिकॉप्टरमधून बारामतीला पोहोचले. विमानतळावर उतरताच विमान कसं आणि कुठं कोसळलं, असा पहिला प्रश्न त्यांनी तिथं उपस्थित असलेल्यांना विचारला.
महाराष्ट्राचं परखड नेतृत्व, प्रशासकीय कामकाजाचा दीर्घ अनुभव, सहकारी नेते, पक्ष पदाधिकारी आणि कार्यकर्त्यांवर प्रेम असणारे, लहानग्यांपासून ज्येष्ठांना आपलेसे वाटणारे नेते आणि उपमुख्यमंत्री अजित पवार यांचे विमान अपघातात निधन झाले. त्यांच्या निधनाचं वृत्त समजताच अवघा महाराष्ट्र हळहळला.
अजित पवारांचं विमान अपघातात निधन झाल्याचं समजताच पवार कुटुंबातील सर्व सदस्य बारामतीकडे रवाना झाले. अजित पवारांचे काका आणि ज्येष्ठ नेते शरद पवार हे देखील बारामतीकडे रवाना झाले. काही वेळातच शरद पवार बारामतीत पोहोचले.
हॅलिकॉप्टरमधून विमानतळावर उतरताच त्यांनी सर्वात आधी अपघात कसा आणि कुठे झाला याची माहिती घेतली. विमान कसं आणि कुठे कोसळलं, अशी विचारणा त्यांनी तिथं उपस्थित असलेल्यांना केली. धावपट्टी जिथं संपते, त्याच्या एक किलोमीटरच्या परिसरात हा विमान अपघात झाला. तिथं असलेल्या खोलगट भागात विमान कोसळलं, अशी माहिती तिथं उपस्थित असलेल्यांनी शरद पवारांना दिली.
काही वेळानंतर अजित पवार यांच्या पत्नी सुनेत्रा पवार, मुलगा पार्थ पवार, बहीण सुप्रिया सुळे या बारामती एअरपोर्टवर पोहोचल्या. सुनेत्रा पवार आणि सुप्रिया सुळेंना अश्रू अनावर झाले. दोघी एकमेकींना मिठी मारून रडल्या. दरम्यान, मुख्यमंत्री देवेंद्र फडणवीस, उपमुख्यमंत्री एकनाथ शिंदे, पंकजा मुंडे यांच्यासह मंत्रिमंडळातील काही सहकारी, तसेच पक्षाचे नेते बारामतीत पोहोचले. सुनेत्रा पवार आणि सुप्रिया सुळे यांचं फडणवीस आणि उपमुख्यमंत्री शिंदे यांनी सांत्वन केलं. पंतप्रधान नरेंद्र मोदी, केंद्रीय गृहमंत्री अमित शहा हे उद्या बारामतीत येणार आहेत.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.