Bhagat Singh Koshyari Resign : भाजपच्या वरिष्ठांचा दबाव असल्याची राज्यपालांनी दिली होती कबुली; शिवसेनेच्या बड्या नेत्याचा गौप्यस्फोट

नवनीत तापडिया

Aurangabad News : माझ्यावर भाजपचा वरिष्ठांचा खूप दबाव आहे. त्यामुळे मला असं वागावं लागत हे राज्यपालांनी मला भेटल्यावर माझ्याकडे कबूल केलं होतं असा गौप्यस्फोट शिवसेना नेते चंद्रकांत खैरे यांनी केलाय.

महाराष्ट्राचे राज्यपाल भगतसिंह कोश्यारी यांचा राजीनामा मंजूर झाला आहे. राष्ट्रपती द्रौपदी मुर्मू यांनी त्यांचा राजीनामा मंजूर केला. तसेच आता महाराष्ट्राचे नवे राज्यपाल म्हणून रमेश बैस यांची नियुक्ती करण्यात आली आहे. बैस यांनी यापूर्वी झारखंडचे राज्यपाल म्हणून पदभार सांभाळला आहे. राज्यपालांचा राजीनामा मंजूर झाल्यानंतर विविध पक्षांच्या राजकीय नेत्यांनी प्रतिक्रिया दिल्या आहेत.

महाराष्ट्राचे राज्यपाल भगतसिंग कोश्यारी (Bhagat Singh Koshyari) यांचा राजीनामा मंजूर झाल्यानंतर चंद्रकांत खैरे (Chandrakant Khaire) यांनी देखील आपली प्रतिक्रिया दिली आहे. तसेच भाजपने (BJP) राज्यपाल बदलण्याचा निर्णय खूप उशिरा घेतला राज्यपाल हे घटनात्मक पद आहे त्या पदाची काय अवस्था झाली? लोकांना आंदोलने करावी लागली निषेध करावा लागला असेही खैरे म्हणाले.

आता नव्या राज्यपालांनी तरी आता कोशारींसारखे वागू नये जर भाजपने तुमच्यावर दबाव टाकला तर तुमचे नाव अशा प्रकारे खराब होऊ शकतो त्यामुळे तुम्ही दबावाला बळी पडू नका असा सल्लाही चंद्रकांत खैरे यांनी नवे राज्यपाल रमेश बैस यांना दिलाय.