Bacchu Kadu News : गणपती मंडळापुढे जमा झालेले पैसे सचिन तेंडुलकर यांना पाठवणार असल्याचे आमदार बच्चू कडू यांनी साेलापूर दाै-यावर असताना नमूद केले. जंगली रमीची जाहिरात करणा-या महान खेळाडूस हे पैसे त्यांच्या घरी पाेहचविले जातील असेही कडू यांनी स्पष्ट केले. (Maharashtra News)
सचिन तेंडुलकर यांनी जंगली रमीची जाहिरात केल्याच्या विरोधात सोलापुरातील अकोलेकाटी गावातील गणपती मंडळपुढे चक्क भीकपेटी ठेवण्यात आली आहे. प्रहार संघटनेचे अध्यक्ष आमदार बच्चू कडू यांनी या मंडळाला भेट देत गणरायाची पूजा केली. त्यानंतर या पेटीत स्वतः 100 रुपये टाकत सचिन तेंडुलकर यांच्यावर टीका केली.
महाराष्ट्रातील प्रहार संघटनेच्या विचारांचे जितके गणेश मंडळ आहेत तिथे अशा भीक पेटी ठेवल्या जातील. यात जमा होणारे पैसे विसर्जन झाल्यानंतर तेंडुलकर यांच्या घरी पोहचवू असा इशारा देखील आमदार बच्चू कडू यांनी यावेळी दिला.
दरम्यान, उत्तर सोलापूर तालुक्यातील अकोलेकाटी या गावात मुस्लिम बांधवांनी एकत्रित येत गणपती मंडळाची स्थापना केली आहे. सामाजिक एकतेचा संदेश देणाऱ्या यार मंडळातील गणरायाची पूजा प्रहार संघटनेचे आमदार बच्चू कडू यांच्या हस्ते पार पडली.
राज्यात एकीकडे दंगलीचे वातावरण झाले, मात्र अशात अकोलेकाटी या गावातील मुस्लिम बांधवांनी पुढाकार घेऊन गणपती मंडळाची स्थापना केली हे अतिशय धाडसाचे आणि कौतुकाचे काम आहे. मी या कार्याला सलाम करतो अशी प्रतिक्रिया यावेळी आमदार बच्चू कडू यांनी दिली.
दरम्यान आमच्या गावाची लोकसंख्या ही पाच हजार आहे. मात्र आम्ही सर्व गुण्या गोविंदाने राहत आलोय. यंदा पहिल्यांदाच आम्ही गणेशोत्सव मुस्लिम युवा गणेश मंडळाच्या माध्यमातून करतोय याचा आम्हाला आनंद असल्याची भावना ग्रामस्थांनी व्यक्त केली.
Edited By : Siddharth Latkar
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.
