Shirpur News : झोपेतच काळाचा घाला; घराचे छत कोसळले, छताखाली दबून वृद्धेचा मृत्यू, नातू व आजोबा गंभीर

धुळे : धुळे शहरासह परिसरात कालपासून पावसाची संततधार सुरु आहे. या पावसामुळे रात्रीच्या सुमारास एका घराचे छत अचानक कोसळल्याची घटना शिरपूर तालुक्यातील गिधाडे गावात घडली आहे. या घटने छताच्या खाली दबून वृद्ध महिलेचा मृत्यू झाला आहे. तर सोबत असलेले पती आणि नातू हे देखील गंभीर जखमी झाले आहेत. दोघांवर शासकीय वैद्यकीय रुग्णालयात उपचार सुरु आहेत. सदरची घटना मध्यरात्रीच्या सुमारास घडली आहे. 

धुळ्याच्या शिरपूर तालुक्यातील गिधाडे गावात मध्यरात्रीच्या सुमारास सदरची घटना घडली असून या घटनेत सुपाबाई तात्या चव्हाण (वय ६३) असे मृत वृद्ध महिलेचे नाव आहे. दरम्यान धुळे शहर व जिल्ह्यातील अनेक भागात काल दुपारपासून पावसाची संततधार सुरु आहे. रात्रीच्या सुमारास देखील पाऊस सुरूच होता. यामुळे जुने असलेल्या घराचे छत पावसामुळे अचानकपणे कोसळले. यावेळी घरात परिवार झोपलेला होता. 

रात्रीच्या सुमारास घरात वृद्ध पती- पत्नी आणि त्यांचा नातू झोपलेले होते. तिघेजण गाढ झोपेत असताना संततधार पावसामुळे घराचे छत अंगावर पडल्यामुळे आजी- आजोबा आणि नातू असे तिघेजण छताच्या ढिगाऱ्याखाली दबले गेले. यात वृद्ध महिलेचा छताखाली दाबून जागीच मृत्यू झाला. तर आजोबा व नातू हे गंभीर जखमी झाले आहेत. जखमींना शासकीय रुग्णालयात उपचारासाठी दाखल केले आहे. 

आवाज ऐकून ग्रामस्थ धावले 

जवळपास रात्री दीड वाजेच्या सुमारास दुर्घटना घडली आहे. गाव झोपलेले असताना अचानकपणे रात्री मोठा आवाज झाला. यामुळे परिसरातील नागरिकांनी घटनास्थळी धाव घेतली. यानंतर बचावकार्य करत आजीचा मृतदेह ढीगाऱ्या खालून काढला. तर वृद्ध इसम व चिमुकल्याला ढीगाऱ्याखालून काढत त्यांचा जीव वाचविला आहे.