Shirpur News: मासेमारीच्‍या जाळ्यात अडकून बुडाला; पोहायला गेलेल्‍या एनडीए प्रशिक्षणार्थी अधिकाऱ्याचा मृत्‍यू

शिरपूर (धुळे) : राष्ट्रीय संरक्षण अकादमीच्या (एनडीए) प्रशिक्षणार्थी अधिकाऱ्याचा (NDA) पाण्यात बुडाल्याने (Shirpur) मृत्यू झाला. ही घटना १५ जूनला सायंकाळी हाडाखेड (ता.शिरपूर) येथे घडली. (Maharashtra News)

हिमांशू शरद चौधरी (वय २१, रा.जापोरा ता.शिरपूर) असे मृत युवकाचे नाव आहे. तो पुणे येथील एनडीएमध्ये प्रशिक्षण घेत होता. करवंद धरणाच्या हाडाखेड येथील जलक्षेत्रात तो मित्रांसह पोहायला गेला होता. तेथे पोहण्यासाठी तो पाण्यात उतरला. उत्तम जलतरणपटू असल्याने तो खोल पाण्यात शिरला. मात्र मासेमारीसाठी लावलेल्या जाळ्यात तो अडकला. धडपड करूनही पाण्याबाहेर येण्यात अपयश आल्याने तो बुडाला.

सुटीत आला होता घरी

त्याच्या मित्रांनी आकांत केल्यानंतर परिसरातील लोक जमले. त्यांनी हिमांशूचा मृतदेह पाण्याबाहेर काढला. दहिवद (ता.शिरपूर) येथील सामाजिक कार्यकर्ते मयूर राजपूत व सहकाऱ्यांनी मदतकार्य केले. जापोरा येथे शुक्रवारी (१६ जून) हिमांशूच्या मृतदेहावर अंत्यसंस्कार करण्यात आले. वर्षभरापूर्वी त्याची एनडीएसाठी निवड झाली होती. सुटीत तो घरी आला होता. या घटनेमुळे जापोरा गावात हळहळ व्यक्त केली जात आहे.