Bus Accident : धुळ्यात एसटी बसला भीषण अपघात; २० हून अधिक प्रवासी जखमी

Dhule ST Bus Accident : धुळे जिल्ह्यातून एक मोठी बातमी समोर आली आहे. धुळ्यात (Dhule) एसटी बस उलटून भीषण अपघात झाला आहे. या अपघात २० प्रवासी जखमी झाले आहेत. जखमींना तातडीने जवळच्या रुग्णालयात दाखल करण्यात आलं आहे. समोरून येणाऱ्या वाहनाने हुलकावणी दिल्याने हा अपघात झाल्याची प्राथामिक माहिती आहे.  (Latest Marathi News)

मिळालेल्या माहितीनुसार, अपघातग्रस्त बस ही चाळीसगाव येथून प्रवाशांना घेऊन अक्कलकुवाकडे निघाली होती. सकाळी साडेसात वाजेच्या सुमारास बस धुळे तालुक्यातील तरवाडे गावाजवळ आली असता, समोरून भरधाव वेगात येणाऱ्या एका वाहनाने बसला हुलकावणी दिली.

हुलकावणी देताच, बसचालकाचे बसवरील नियंत्रण सुटले. आणि बस थेट रस्त्याच्या कडेला जाऊन उलटली. या भीषण अपघातात (Bus Accident) जवळपास २० प्रवासी जखमी झाले आहेत. दरम्यान, अपघाताची माहिती मिळताच, स्थानिक नागरिकांसह पोलिसांनी घटनास्थळी धाव घेतली.

बसमध्ये अडकून पडलेल्या प्रवाशांना पोलिसांनी स्थानिक नागरिकांच्या मदतीने बाहेर काढले. जखमींना तातडीने उपचारासाठी जवळच्या शासकीय रुग्णालयात दाखल करण्यात आला आहे. सुदैवाने बसचा वेग कमी असल्याने या घटनेत कोणतीही जीवितहानी झालेली नाही. मात्र, अपघातात बसचे मोठ्या प्रमाणात नुकसान झाले आहे.

Edited By - Satish Daud