Dhule News : कचरा संकलन करणाऱ्या गाडीने बालकास चिरडले; धुळे शहरातील धक्कादायक घटना

धुळे : धुळे महापालिकेच्या कचरा संकलन करणाऱ्या गाड्या शहरात सकाळच्या सुमारास फिरत असतात. दरम्यान सकाळी शहरातील गुणधर्म परिसरात कचरा संकलन करत असताना खेळत असलेल्या दिन वर्षाच्या बालकास चिरडल्याची घटना घडली आहे. यात बालकाचा मृत्यू झाला आहे. 

धुळे (Dhule News) शहरातील गुणधर्म परिसरात बर्फ कारखाना रस्त्यावर हि घटना सकाळच्या सुमारास घडली. शौर्या बडगुजर असे घटनेत मृत झालेल्या बालकाचे नाव आहे. दरम्यान महापालिकेने कचरा संकलन करण्याचा ठेका दिला आहे. त्यानुसार शहरातील विविध भागात कचरा गाड्या या कचरा संकलित करण्यासाठी फिरत असतात.

आज सकाळी सदर गाडी शहरातील जुने धुळेतील गुणधर्म परिसरात बर्फ कारखाना रस्त्यावर आली असता, खेळत असलेल्या चिमुकल्याला जोरदार धडक (Accident) देत उडविले. यात मुलाला गंभीर दुखापत झाली होती. घटना घडल्यानंतर परिसरातील नागरिकांनी शौर्या यास लागलीच रुग्णालयात दाखल केले. मात्र या दीड वर्षीय चिमुकल्याचा मृत्यू झाला. यावेळी त्याच्या आई- वडिलांनी एकच आक्रोश केला.  

वाहन चालक पोलिसांच्या ताब्यात 

घटनेनंतर परिसरात नागरिकांची गर्दी जमली होती. तर जुने धुळे परिसरातील नागरिकांनी महानगरपालिकेच्या विरोधात रोष व्यक्त केला. दरम्यान पोलिसांनी वाहन चालकाला ताब्यात घेतले आहे.