Dharashiv News : पंधरा दिवसांपासून शाळेला कुलूपच; विद्यार्थ्यांच्या हाती दिला दाखला, शाळेसमोर पालकांचा ठिय्या

बालाजी सुरवसे 

धाराशिव : शैक्षणिक वर्ष सुरु होऊन पंधरा दिवसांच्यावर कालावधी झाला आहे. मात्र धाराशिवच्या बोरगाव खुर्द येथील शाळेंचे कुलूपच उघडण्यात आलेले नाही. अर्थात मागील पंधरा दिवसापासून शाळा कुलूपबंद असून या शाळेत येणाऱ्या विद्यार्थ्यांचे शैक्षणिक नुकसान होत आहे. शाळा दुसरीकडे स्थलांतरित केली जात असल्याने हा सर्व प्रकार सुरु आहे. 

राज्यात ऐकीकडे १५ जूनपासून शाळा सुरू झाल्या आहेत. त्यामुळे शाळेचा परिसर विद्यार्थ्यांनी गजबजून गेला आहे. मात्र (Dharashiv) धाराशिवच्या कळंब तालुक्यातील बोरगाव खुर्द येथील राजीव गांधी विद्यालय ही इयत्ता पाचवी ते दहावी पर्यंतची शाळा आहे. मात्र अद्यापही शाळा कुलुपबंद आहे, ही शाळा (School) लातुरला स्थलांतरित करण्याच्या शाळा प्रशासनाच्या हालचाली चालु असुन त्यामुळे शाळा प्रशासनाने विद्यार्थी व पालकांच्या हातात टि.सी देवुन रिकामे झाले आहेत. 

या सर्व प्रकारामुळे विद्यार्थ्यांचे शैक्षणिक नुकसान होत असुन तब्बल ३७ वर्षापासून सुरू असलेली ही शाळा स्थलांतरित करण्यात येत असल्याने विद्यार्थी व पालकांनी आक्रमक भुमिका घेतली आहे. विद्यार्थी व पालकांनी शाळेच्या आवारासमोर ठिय्या आंदोलन सुरू केले असून आमची शाळा सुरू करा; अशी मागणी या विद्यार्थीनी केली.