केवळ १५ दिवसांत भाजपची सोडली साथ; ठाकरेंच्या शिवसेनेत घरवापसी, नेमकं कारण काय?

राजकीय वर्तुळातून मोठी बातमी समोर येत आहे. आगामी स्थानिक स्वराज्य संस्थांच्या निवडणुकीच्या तोंडावर छत्रपती संभाजीनगर जिल्ह्यातील गंगापूर नगरपालिकेच्या राजकारणात मोठा उलथापालथीचा खेळ पाहायला मिळत आहे. नुकतेच भाजप पक्षात प्रवेश केलेले अविनाश पाटील यांनी केवळ १५ दिवसांतच भाजपला रामराम ठोकला. तसेच पुन्हा एकदा उद्धव बाळासाहेब ठाकरे यांच्या शिवसेनेत घरवापसी केली. या पक्षप्रवेशामुळे शिवसेना ठाकरे गटाची ताकद वाढली.

आगामी स्थानिक स्वराज्य संस्थांच्या निवडणुकांना अवघे काही महिने शिल्लक आहेत. राज्यातील नगरपरिषद आणि नगरपंचायीताच्या निवडणुकांची घोषणा करण्यात आली. गेल्या अनेक वर्षांपासून रखडलेल्या या निवडणुका लवकरच पार पडतील. या निवडणुकांकडे प्रत्येकाचं लक्ष आहे. अशातच छत्रपती संभाजीनगर जिल्ह्यात राजकीय उलथापालथ पाहायला मिळत आहे.

नुकतेच भाजप पक्षात प्रवेश केले अविनाश पाटील यांनी १५ दिवसांतच पक्षाला रामराम ठोकला आहे. त्यांनी स्वगृही जाण्याचा निर्णय घेतला आहे. अविनाश पाटील यांनी पुन्हा उद्धव बाळासाहेब ठाकरे यांच्या शिवसेनेत प्रवेश केला आहे. घरवापसी केल्यानंतर अविनाश पाटील यांना नगराध्यक्ष पदाचे उमेदवार म्हणून घोषणा केलीये.

शिवसेना ठाकरे गटाचे अंबादास दानवे यांचे पाटील हे अत्यंत विश्वासू आहेत. अविनाश पाटील यांनी २८ ऑक्टोबर रोजी आमदार प्रशांत बंब यांच्या उपस्थितीत भाजपमध्ये प्रवेश केला होता. भाजपकडून त्यांना नगराध्यक्षपदाच्या उमेदवारीचा शब्द दिल्याचे बोलले जात होते. मात्र ऐनवेळी भाजप आपला उमेदवार बदलणार असल्याचे समजताच, अविनाश पाटील यांनी चंद्रकांत खैरे आणि अंबादास दानवे यांच्या उपस्थितीत पुन्हा उद्धवसेनेत प्रवेश केला.