Chhatrapati Sambhaji Nagar : गरोदर मातेसह नवजात बालकाचा रस्त्यातच मृत्यू ; मन सुन्न करणारी घटना

छत्रपती संभाजीनगर जिल्ह्यात दोन सरकारी रुग्णालयांनी उपचार न करताच दुसरीकडे रेफर केल्याने 27 वर्षीय गरोदर मातेसह नवजात बालकाचा रस्त्यातच मृत्यू झाला. ही धक्कादायक घटना सिल्लोड तालुक्यात रविवारी पहाटे घडली. मदिनाबी जमील शाह (रा. आमठाणा) असे मृत महिलेचे नाव आहे.

मिळालेल्या अधिक माहितीनुसार, आमठाणा येथील मदिनाबी गरोदर होती. प्रसूतिवेदना सुरू झाल्याने तिच्या पतीसह एका नातेवाईक महिलेने तिला आमठाणा येथील प्राथमिक आरोग्य केंद्रात शनिवारी सायंकाळी ७ वाजता दाखल केले.

तेथे तिच्यावर प्रसूतीसाठी प्रयत्न करताच तेथील डॉक्टर, कर्मचाऱ्यांनी रात्री ९ वाजता सिल्लोड उपजिल्हा रुग्णालयात रेफर केले. तेथेही डॉक्टरांनी प्रसुतीसाठी प्रयत्न न करता तिला रात्री १२ वाजता छत्रपती संभाजीनगर येथील घाटी रुग्णालयात रेफर केले. मात्र रस्त्यातच तिचा मृत्यू झाला.

मदिनाबीची दोन बाळे यापूर्वी प्रसूतीदरम्यान मरण पावली होती. सध्या तिला दोन मुली आहेत. मदिनाबीचे हे पाचवे बाळंतपण होते. तिच्या जाण्याने दोन लहान मुलींचे मातृछत्र हरपले आहे.

तर गरोदर महिलेला ज्यावेळी रुग्णालयात दाखल केले, तेव्हा तिचे हिमोग्लोबिन केवळ 3 पॉइंट होते. तर बीपी 180 झाला होता. बाळ गर्भातच मरण पावले होते. तिची प्रकृती गंभीर होती म्हणून तिला आम्ही रात्री रेफर केले,असं रुग्णालय प्रशासनाने सांगितलं आहे.