Accident : चालकाला डुलकी लागली अन् कार पुलावरून कोसळली, ४ जणांचा जागीच मृत्यू, ५ गंभीर

संजय तुमराम, साम टीव्ही प्रतिनिधी

Chandrapur fatal road accident today : एका कार्यक्रमासाठी तेलंगणामधून महाराष्ट्रात आलेल्या वाहनाचा चंद्रपूरमध्ये भीषण अपघात झाला. चालकाला डोळा लागल्यामुळे वाहनावरील नियंत्रण सुटले अन् काळाने घाला घातला. या भीषण दुर्घटनेत १३ वर्षांची मुलगी आणि ३ महिलांचा जागीच मृत्यू झालाय. ५ जण गंभीर जखमी आहेत. त्यांच्यावर जवळच्या रूग्णालयात उपचार करण्यात येत आहे. अपघातानंतर महामार्गावर वाहतूक कोंडी मोठ्या प्रमाणात झाली होती. पोलिसांनी तात्काळ धाव घेत बचावकार्य वेगात केले, अपघातग्रस्त वाहनाला बाजूला केलं अन् वाहतूक सुरळीत केली.

चंद्रपूर जिल्ह्यातील राजुरा तालुक्यातील सोंडो गावाजवळ महामार्गावर भीषण अपघातात झाला. यामध्ये चार महिलांचा मृत्यू झाल्याची धक्कादायक घटना घडली. या सर्व महिला तेलंगणा राज्यातील कागजनगर येथील असल्याची प्राथमिक माहिती मिळाली आहे. चालकाला अचानक डुलकी आल्यामुळे अपघात झाल्याची प्राथमिक माहिती समोर आली आहे. अपघाताची माहिती मिळताच पोलिसांनी घटनास्थळी धाव घेतली. अपघातग्रस्त वाहने बाजूला सारून वाहतूक सुरळीत केली.मृतदेह सध्या पोस्टमार्टमसाठी पाठवण्यात आले आहेत. स्थानिक पोलिसांनी अपघाताची नोंद केली आहे.

तेलंगणातील कागजनगर येथील काही लोक कार्यक्रमासाठी नागपूरला आले होते. हा कार्यक्रम संपल्यानंतर सर्वजण बोलेरो वाहनाने तेलंगणाकडे निघाले होते. त्याचवेळी पहाटेच्या सुमारास पुलावर चालकाला डुलकी आल्याने वाहन पुलाखाली कोसळले. या अपघातात वाहनातील पाच जण गंभीर जखमी झाले आहेत. त्यांची प्रकृती चिंताजनक असल्याची माहिती मिळाली आहे. या अपघातामध्ये चालक बचावला आहे. मृतांमध्ये अफजल बेगम (55), सायरा बानो (45), सबरीन शेख (13), सलमा बेगम झांकीर हुसेन (46) यांचा समावेश आहे. सर्व जखमींना नागपूरच्या रुग्णालयात उपचारासाठी हलवण्यात आले आहे.