Chandrapur Accident News: कुटुंबावर काळाचा घाला; अपघातात एकाच कुटुंबातील ४ जणांचा मृत्यू

चंद्रपूर : आयुर्वेदिक औषध घेण्यासाठी स्वतःच्या मालकीच्या गाडीने मध्य प्रदेशातील बैहर येथील कुमादेही येथे जात असताना परिवारावर काळाने घाला घातला. अपघातात (Accident) ब्रम्हपुरी येथील एकाच कुटुंबातील तिघांचा जागीच (Accident Death) मृत्यू झाला, तर उपचारादरम्यान आणखी एक सदस्य दगावला. (Latest Marathi News)

ब्रम्हपुरीच्या श्रीनगर कॉलनीतील रहिवाशी विजय गणपत बडोले हे आपल्या परिवारासह स्वतःच्या कारने प्रवास करत होते. आयुर्वेदीक औषधी घेण्यासाठी बैहर (मध्‍यप्रदेश) येथे जात होते. दरम्‍यान रस्‍त्‍यावर एका दुचाकी वाहनास वाचविण्याच्या प्रयत्नात असताना कारचे नियंत्रण सुटले व कार रस्त्याच्या कडेला असलेल्या झाडाला धडकली. अपघातात वाहन चालक विजय गणपत बडोले (वय ५८), पत्नी कुंदा बडोले (वय ५२), मुलगा गिरीश बडोले (वय ३२) तर विवाहित मुलगी मोनाली चौधरी (बडोले) यांचा मृत्यू झाला.

लहान मुलांसह महिला गंभीर

या अपघातात पती– पत्‍नी, मुलगा व मुलीचा मृत्‍यू झाला आहे. तर सोबत असलेले दोन लहान नातवंडे व सून गंभीर जखमी आहेत. गंभीर जखमीना गोंदिया येथील शासकीय रुग्णालयात उपचारार्थ दाखल करण्यात आले. मृतकाचे शवविच्छेदन करून त्यांचे मृतदेह ब्रह्मपुरी येथे आणण्यात आले .