राज्याच्या राजकारणाला सध्या विधानसभा निवडणुकांचे वेध लागले आहेत. विधानसभेच्या निवडणुका काही महिन्यांवर आल्याने राजकीय पक्षांनी जोरदार तयारी सुरू केली आहे. अशातच केंद्रीय निवडणूक आयोगाने राज्यातील दोन महत्वाच्या पक्षांसाठी निवडणूक चिन्ह दिले आहे. प्रकाश आंबेडकर यांच्या वंचित बहुजन आघाडीला आणि बच्चू कडू यांच्या प्रहार संघटनेला निवडणूक आयोगाने नवे चिन्ह दिले आहे.
आगामी विधानसभा निवडणुकीची सर्वच राजकीय पक्षांनी जोरदार तयारी सुरू केली आहे. त्यामध्ये वंचित बहुजन आघाडी हा पक्ष सुद्धा मागे नाही. वंचितचे प्रमुख प्रकाश आंबेडकर सध्या आरक्षण बचाव यात्रा करत आहेत. अशातच दिनांक 14 ऑगस्ट रोजी भारतीय निवडणुक आयोग सचिवालयाकडून एक पत्र जारी करण्यात आले. त्यामध्ये वंचित बहुजन आघाडीला विधानसभा निवडणुकीत राज्यातील सर्व विधानसभा मतदारसंघात 'गॅस सिलेंडर' चिन्ह दिल्याचे घोषित केले आहे.
25 जुलै ते 7 ऑगस्ट या काळात वंचित बहुजन आघाडीने आरक्षण बचाव यात्रेच्या माध्यमातून संपूर्ण राज्यात दौरा केला. त्यामुळे विधानसभा निवडणुकीसाठी वंचित बहुजन आघाडीने जोरदार तयारी केल्याचे दिसले. यातच राज्यातील संपूर्ण विधानसभा मतदारसंघात गॅस सिलेंडर चिन्ह निवडणूक आयोगाकडून मिळाल्याने वंचित बहुजन आघाडीसाठी ही खूप चांगली संधी मानली जात आहे.
त्याचबरोबर बच्चू कडू यांच्या प्रहार जनशक्ती पक्षाला भारतीय निवडणूक आयोगातर्फे "बॅट" हे अधिकृत निवडणूक चिन्ह मिळाले आहे. प्रहार जनशक्ती पक्षाचे संस्थापक अध्यक्ष बच्चू कडू यांनी भारतीय निवडणूक आयोगाकडे अधिकृत निवडणूक चिन्हासाठी अर्ज केला होता. यानंतर आता येणाऱ्या निवडणुकीत प्रहार जनशक्ती पक्षाचे उमेदवार बॅट चिन्हावर निवडणूक लढणार असल्याचे स्पष्ट झाले आहे.
सकाळ+चे सदस्य व्हा
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.