भाजपचा विजयरथ सुसाट! मतदानाआधीच आणखी एका महापालिकेत पारडं झालं जड, नेमकं काय राजकारण घडलं?

भूषण अहिरे, साम टीव्ही

धुळे महानगरपालिका निवडणुकीच्या रिंगणात भारतीय जनता पक्षाने आपली पकड अधिक मजबूत केली असून, पक्षाची बिनविरोध विजयाची घोडदौड सातत्याने सुरूच आहे, उमेदवारी अर्ज मागे घेण्याच्या पहिल्याच दिवशी प्रभाग क्रमांक 17 'ब' मधील भाजपच्या अधिकृत उमेदवार सुरेखा चंद्रकांत उगले यांची बिनविरोध निवड झाली आहे. त्यांच्या विरोधात रिंगणात असलेल्या दोन अपक्ष उमेदवारांनी आपले अर्ज मागे घेतल्याने उगले यांचा विजय सुकर झाला आहे.

भाजप आमदार अनुप अग्रवाल यांनी साम टिव्हीशी बोलतांना काल पहिला उमेदवार बिनविरोध झाल्यानंतर "आगे आगे देखो होता हे क्या" असे सूचक वक्तव्य केल होतं. त्याप्रमाणे सलग दुसऱ्या दिवशी धुळ्यात भाजपचे तिसरे उमेदवार बिनविरोध झाले आहे. निवडणुकीच्या प्रत्यक्ष मतदानापूर्वीच भाजपने मिळवलेले हे यश विरोधकांसाठी मोठा धक्का मानले जात असून, शहराच्या राजकीय वर्तुळात या विजयाची जोरदार चर्चा रंगली आहे.

अर्ज दाखल करून 24 तासांत धुळे महानगरपालिका निवडणुकीमध्ये भाजपचे दोन नगरसेवक बिनविरोध निवड झाले होते आणि सर्वात महत्त्वाचं म्हणजे हे दोन्ही बिनविरोध झालेले नगरसेवक हे दुसऱ्या पक्षातून भाजपात आयत करण्यात आले होते. काही दिवसांपूर्वीच या दोन्ही नगरसेवकांचा दुसऱ्या पक्षातून भाजपमध्ये पक्षप्रवेश झाला होता आणि हे दोन्ही बिनविरोध झालेले नगरसेवक या महिला आहेत.

धुळे महानगरपालिका काबीज करण्यासाठी भाजपतर्फे मोठ्या प्रमाणात आयात उमेदवारांना संधी देण्यात आली आणि या दरम्यान जवळपास विद्यमान 32 नगरसेवकांना तिकीट नाकारण्यात आलं आणि त्यांच्या जागी दुसऱ्या उमेदवारांना भाजपतर्फे उमेदवारी देखील देण्यात आली. यामध्ये बहुतांश उमेदवार हे दुसऱ्या पक्षातून आयात केलेले आहेत.

अशातच आज पुन्हा आणखी एक नगरसेवक बिनविरोध निवडणून आल्याने भाजपचा विजयाचा रथ सुसाट धावत असल्याचे दिसून येत आहे. कल्याण-डोंबिवली, पनवेल आणि आता धुळे या महापालिकांमध्ये भाजपने खाते उघडले असून मतदानाआधीच विजयाचा गुलाल उधळला आहे.