Sharad Pawar : शरद पवारांना मोठा हादरा; बडा नेता साथ सोडणार, पक्षही निश्चित झाला

स्थानिक स्वराज्य संस्थाच्या निवडणुकीनंतरही राजकीय पक्षात नेत्यांचे प्रवेश सुरूच आहेत. बुलढाण्यानंतर आता पंढरपूरमधील एका बड्या नेत्याने शरद पवार गटाची साथ सोडली. पंढरपूरच्या मंगळवेढ्यातील नेत्याने पक्षाचा राजीनामा दिल्याने शरद पवार गटाला मोठा हादरला बसला आहे. या नेत्याच्या राजीनाम्याने स्थानिक पातळीवर घडामोडींना वेग आला आहे.

सोलापूरच्या पंढरपूर मंगळवेढ्यातील अनिल सावंत यांनी राष्ट्रवादी काँग्रेसची साथ सोडली आहे. अनिल सावंत यांच्या निर्णयाने शरद पवार गटात मोठा धक्का बसला आहे. भैरवनाथ शुगरचे अध्यक्ष आणि शरद पवार गटाचे नेते अनिल सावंत शिवसेना शिंदे गटाच्या वाटेवर आहेत . त्यांनी पंढरपुरात १२ एप्रिल रोजी मेळावा आयोजित केला आहे. या मेळाव्यात उपमुख्यमंत्री एकनाथ शिंदे यांच्या उपस्थितीत अनिल सावंत यांचा शिवसेनेत प्रवेश होण्याची शक्यता आहे.

अनिल सावंत यांनी 2024 मध्ये पंढरपूर विधानसभा मतदारसंघातून शरद पवार पक्षाकडून निवडणूक लढवली होती. पंढरपूर विधानसभा मतदारसंघात भाजपचे समाधान आवताडे हे साठेआड हजार मतांनी विजयी झाले होते. या मतदारसंघात काँग्रेस आणि राष्ट्रवादी काँग्रेसच्या मतविभागणीमुळे भाजपचे आवताडे विजयी झाले होते.

भालके देखील शिवसेनेत प्रवेश करणार

काँग्रेस पक्षाकडून पंढरपूर-मंगळवेढा विधानसभा मतदारसंघात निवडणूक लढवलेले भगीरथ भालके देखील शिवसेनेत प्रवेश करणार असल्याची माहिती समोर आली आहे. खासदार प्रणिती शिंदे यांनी भगीरथ भालके यांच्या प्रचारासाठी संपूर्ण मतदारसंघ पिंजून काढला होता. मात्र, भालके आता शिवसेनेत प्रवेश करणार आहेत. त्यामुळे पंढरपुरात महाविकास आघाडीला डबल धक्के बसणार आहेत.