Accident News : पाणी पिण्यासाठी दुचाकी थांबविताच झाला घात; भरधाव ट्रकने चिरडले, दुचाकीस्वाराचे दोन्ही पाय निकामी

शुभम देशमुख 
भंडारा : तुमसर- रामटेक मार्गावरील काटेबाम्हणी गावाजवळ एका भरधाव वेगाने जाणाऱ्या ट्रकने दुचाकीस्वाराला चिरडले. त्यात दुचाकीस्वाराच्या पायावरुन ट्रकचे चाक गेल्याने दोन्ही पायांचा चंदामेंदा होऊन निकामी झाले. सुदैवाने अपघातात सदर दुचाकीस्वाराचा जीव वाचला आहे. जखमी दुचाकीस्वारावर रुग्णालयात उपचार सुरु आहेत.  

भंडारा जिल्ह्यातील उसर्रा येथील दिलीप मोहन आगरे (वय ४५) असे अपघातात जखमीचे नाव असून त्याला उपचारार्थ नागपूरला हलविण्यात आले आहे. जखमी दिलीप आगरे हे उसर्रा येथून सुंदरटोला येथे जाण्यासाठी निघाले होते. याचवेळी काटेबाम्हणी येथील टाकला फाट्याजवळ रस्त्यावर मोटारसायकल उभी करून पाणी पिण्याकरीता समोरच्या सायकल स्टोअर दुकानाजवळ गेले होते. 

रस्ता ओलांडत असताना ट्रकने उडविले 

पाणी पिऊन मोटारसायकलकडे परत जात असतांना खाप्याकडून टाकला गावाकडे भरधाव जाणाऱ्या ट्रक चालकाने रस्ता ओलांडत असलेल्या दिलीप आगरे याला धडक देत चिरडले. त्यात दिलीप आगरे याच्या दोन्ही पायांचा चेंदामेंदा होऊन निकामी झाले. ट्रकचा चालक संजय कुकडे याच्या निष्काळजीपणामुळे हा अपघात झाला असून सुदैवाने दुचाकीस्वाराचा जीव वाचला आहे. 

जखमींची प्रकृती चिंताजनक 

दरम्यान अपघाताची माहिती तुमसर पोलिसांना मिळताच त्यांनी घटनास्थळ गाठून जखमीला उपचाराकरीता उपजिल्हा रुग्णालय तुमसर येथे पाठविण्यात आले. मात्र जखमीची प्रकृती चिंताजनक असल्याने त्याला नागपूरला हलविण्यात आले. तर तक्रारीवरुन तुमसर पोलिसात आरोपी ट्रकचालक विरुद्ध गुन्हा दाखल केला आहे.