Santosh Deshmukh Case : संतोष देशमुखांचं लोकेशन सांगणाऱ्याला क्लीन चिट, आरोपपत्रात नेमकं काय म्हटलंय?

योगेश काशिद, साम टीव्ही, प्रतिनिधी

बीडच्या मस्साजोग गावचे सरपंच संतोष देशमुख यांच्या हत्या प्रकरणातील मोठी अपडेट समोर आली आहे. वाल्मीक कराड हाच संतोष देशमुख हत्या प्रकरणातील मुख्य सूत्रधार असल्याचे पोलिसांनी दाखल केलेल्या आरोपपत्रामध्ये म्हटले आहे. या आरोपपत्रामधून सिद्धार्थ सोनवणे या आरोपीचे नाव कमी करण्यात आले आहे. सोनवणेने देशमुख यांचे लोकेशन इतरांना पुरवले होते.

९ डिसेंबर रोजी संतोष देशमुख यांचे अपहरण करण्यात आले. त्या दिवशी संतोष देशमुख हे केजहून मस्साजोगच्या दिशेने निघाल्याचे सिद्धार्थ सोनवणेने सुदर्शन घुलेला सांगितले होते. देशमुख यांचे लोकेशन दिल्याच्या आरोपाखाली सिद्धार्थ सोनवणेला ताब्यात घेण्यात आले होते. अन्य आरोपींसह त्याच्यावरही कारवाई होणार असे म्हटले जात होते.

दरम्यान सिद्धार्थ सोनवणे याच्या विरोधामध्ये सबळ पुरावे न मिळाल्याने त्याचे नाव आरोपी दोषपत्रातून कमी करण्यात आल्याची माहिती समोर आली आहे. सिद्धार्थ सोनवणे हा संतोष देशमुख यांच्याच मस्साजोग गावचा गावकरी आहे. त्यानेच सुदर्शन घुलेला संतोष देशमुख यांच्या लोकेशनबद्दल कळवले होते.

आरोपीपत्रातील आरोपी -

नंबर एक आरोपी - वाल्मीक कराड

नंबर दोन आरोपी - विष्णू चाटे

नंबर तीन आरोपी - सुदर्शन घुले

नंबर चार आरोपी - प्रतीक घुले

नंबर पाच आरोपी - सुधीर सांगळे

नंबर सहा आरोपी - महेश केदार

नंबर सात आरोपी - जयराम चाटे

नंबर आठ आरोपी - फरार कृष्णा आंधळे

गोपनीय साक्षीदारांंनी दिलेल्या साक्षीपुराव्यानंतर वाल्मीक कराडच्या विरुद्ध पुरावे पोलिसांना मिळाले. वाल्मीक कराडने खंडणी मागितली होती. त्यातून झालेल्या वादातून संतोष देशमुख यांची हत्या झाली. सुदर्शन घुले हा देशमुख यांना मारहाण करत असल्याचा व्हिडीओ सीआयडीजवळ असल्याचेही समोर आले आहे.