भय इथले संपेना! बीडमध्ये २४ तासांत २ हत्या; बसस्थानकाजवळ आढळला शिक्षकाचा मृतदेह तर आंबेजोगाईत तरुणाला संपवलं

योगेश काशिद, बीड प्रतिनिधी

Beed Crime News : बीड जिल्ह्यात गुन्हेगारांना कायद्याचा धाक उरला आहे की नाही, असा गंभीर प्रश्न निर्माण झाला आहे. गेल्या २४ तासांत आंबेजोगाई पोलीस ठाण्याच्या हद्दीत दोन धक्कादायक घटना समोर आल्यामुळे संपूर्ण बीड जिल्ह्यात खळबळ उडाली आहे. जुन्या वादातून एका तरुणाची धारदार शस्त्राने हत्या करण्यात आली, तर दुसरीकडे आंबेजोगाई बसस्थानकाजवळ एका शिक्षकाचा संशयास्पद मृतदेह आढळून आला आहे. नातेवाईकांनी ही हत्या असल्याचा संशय व्यक्त केल्यामुळे बीडमध्ये खळबळ उडाली आहे.

जुन्या वादातून तरुणाची धारदार शस्त्राने हत्या

घाटनांदुर येथील ज्ञानेश्वर वाकडे या तरुणाची जुन्या वादातून काही जणांनी धारदार शस्त्राने निर्घृण हत्या केली. या घटनेमुळे संतप्त झालेल्या वाकडे कुटुंबीय आणि ग्रामस्थांनी सकाळी ८ वाजल्यापासून आंबेजोगाई ग्रामीण पोलीस ठाण्यासमोर मृतदेह ठेवून ठिय्या आंदोलन सुरू केले होते. जोपर्यंत आरोपींवर गुन्हे दाखल होत नाहीत, तोपर्यंत मागे हटणार नाही अशी भूमिका त्यांनी घेतली होती. अखेर पोलिसांनी ७ आरोपींवर गुन्हे दाखल केल्यानंतर हे आंदोलन तात्पुरते स्थगित करण्यात आले.

या प्रकरणात आतापर्यंत ७ आरोपी असल्याचे स्पष्ट झाले आहे. पोलिसांनी तत्परता दाखवत ५ आरोपींना ताब्यात घेतले आहे. उर्वरित २ आरोपींचा शोध घेण्यासाठी पोलीस पथके रवाना झाली आहेत, अशी माहिती पोलीस प्रशासनाने दिली आहे.

आंबेजोगाई बसस्थानकाजवळ शिक्षकाचा मृतदेह

ज्ञानेश्वर वाकडे खून प्रकरणाचा तपास सुरू असतानाच, आंबेजोगाई बसस्थानकासमोर एका शिक्षकाचा मृतदेह आढळून आल्याने खळबळ उडाली. हा मृत्यू नैसर्गिक नसून त्यांची हत्या करण्यात आल्याचा आरोप मृत शिक्षकाच्या नातेवाईकांनी केला आहे. एकाच दिवसात दोन गंभीर घटना घडल्यामुळे आंबेजोगाई परिसरात भीतीचे वातावरण पसरले आहे.

गुन्हेगारांवर वचक कधी बसणार?

२४ तासांच्या आत एका तरुणाची हत्या आणि एका शिक्षकाचा संशयास्पद मृतदेह मिळणे, यावरून बीड जिल्ह्यातील कायदा-सुव्यवस्था किती ढासळली आहे, हे दिसून येते. मारेकऱ्यांना पोलिसांचा अजिबात धाक राहिला नसल्याची संतप्त प्रतिक्रिया नागरिकांमधून उमटत आहे. या दोन्ही प्रकरणांचा सखोल तपास करून दोषींवर कडक कारवाई करण्याची मागणी आता जोर धरत आहे.