Baramati Accident: कॉलेजवरून घरी जाताना काळाचा घाला, दुचाकीसह तरुणाला डंपरने चिरडलं, अपघाताचा थरार CCTV मध्ये कैद

सागर आव्हाड, पुणे

बारामतीमध्ये भीषण अपघाताची घटना समोर आली आहे. भरधाव डंपरने दुचाकीला चिरडले. या अपघातामध्ये एका तरुणांचा जागीच मृत्यू झाला. बारामतीमधील तांदूळवाडीमध्ये हा अपघात झाला. अपघाताचा थरार सीसीटीव्हीमध्ये कैद झाला आहे. या अपघातानंतर घटनास्थळावर गावकऱ्यांनी मोठी गर्दी केली होती. बारामती पोलिस या अपघाताचा तपास करत आहेत.

मिळालेल्या माहितीनुसार, बारामतीच्या तांदूळवाडीमध्ये डंपरने दुचाकीला धडक दिली. डंपर चालकाने अचानक यु टर्न घेण्याचा प्रयत्न केला. त्यामुळे दुचाकीवरून भरधाव वेगात येणाऱ्या तरुणांचा तोल गेला आणि ते दुचाकीसह खाली पडले. यावेळी डंपरच्या पुढच्या चाकाखाली आल्यामुळे एका तरुणाचा जागीच मृत्यू झाल.

दुचाकीसह तरुणाला चिरडल्यानंतर या दुचाकीवर बसलेल्या दुसऱ्या तरुणाने डंपर चालकाला अडवत जाब विचारण्याचा प्रयत्न केला. तेव्हा डंपर चालक खाली उतरला आणि त्याने जखमी मुलाला पाहिले आणि त्याने डंपर तिथेच सोडून घटनास्थळावरून पळ काढला. या तरुणाने पाठलाग करत डंपर चालकाला पकडण्याचा प्रयत्न केला. पण तो पळून गेला. ही संपूर्ण घटना सीसीटीव्हीमध्ये कैद झाली. हे दोन्ही तरुण महाविद्यालयातून घरी निघाले होते त्याचवेळी ही घटना घडली.