Voter List : अजब कारभार चव्हाट्यावर! नाव, पत्ता नव्हे अनेक गावं मतदार यादीतून गायब, अमरावतीत खळबळ

Amravati villages missing from voter list before Zilla Parishad elections : राज्यात स्थानिक स्वराज्य संस्थांच्या निवडणुकाची धुरळा काही दिवसातच उडणार आहे. आयोगाकडून निवडणुकीची तयारी करण्यात येतेय. पण अमरावतीमधील गाही गावं मतदार यादीतून गायब झाल्याची धक्कादायक माहिती उघड झाली आहे. अमरावती जिल्हा परिषद, पंचायत समित्यांच्या निवडणुकीआधी आयोगाकडून प्रारूप मतदार याद्या जाहीर करण्यात आल्या. त्यामध्ये अमरावती जिल्ह्यातील अंजनगाव सुर्जी तालुक्यातील अनेक गावे गहाळ झाल्याचे समोर आले आहे.

जिल्हा परिषद, पंचायत समिती निवडणूकीच्या पूर्वसंध्येलाच निवडणूक विभागाचा हा अजब कारभार चव्हाट्यावर आला आहे. निवडणूक पूर्वी निवडणूक विभागाने प्रसिद्ध केलेल्या प्रारूप मतदार याद्यांमध्ये अख्खे गावे गायब झाल्याचा आरोप माजी सभापती शशिकांत मंगळे यांनी केला आहे. त्यांनी याबाबत जिल्हाधिकारी यांकडे तक्रार केली आहे. संबंधित अधिकाऱ्यावर कारवाईची मागणीही त्यांनी यावेळी केली.

बच्चू कडूंचा संताप, काय म्हणाले?

आधी मतदार यादींमधील नाव गायब होत होते, आता गाव गायब होत आहे. ही निवडणूक आयोगाची मोठी गंभीर चूक आहे. लोकशाहीला अशा प्रकारे जर छेडल्या जात असेल आणि अधिकारी अशा प्रकारे वागत असेल तर उद्या मतदार नावाची गोष्ट संपली तर राजेशाही सुरू होईल. लोकशाहीतून जो हुकूमशहा चालवण्याचा प्रकार आहे, याचा मी निषेध करतो, याचे स्पष्टीकरण निवडणूक आयोगाने दिले पाहिजे, असे बच्चू कडू म्हणाले.

कोणती नावे मतदार यादीतून गहाळ ?

सुर्जी तालुक्यातील गट क्रमांक १० कापूसतळणी, ११ भंडारज, १२ सातेगाव असे तीन गट, त्याशिवाय गण क्रमांक १८ खानमपूर पांढरी, गण क्रमांक २० कापूसतळणी, २१ चौसाळा, २२ भंडारज, २३ सातेगाव व २४ कोक अशा सहा गणांच्या यादीमध्ये खानमपूर पांढरी गणामधील टाकरखेडा मोरे, कापूसतळणी गणामधील अहमदपूर (टाकरखेडा मोरे), रौंदळपूर (कापूसतळणी), पोही, रत्नापूर (पोही), जवळा बु. जवळा खुर्द, औरंगपूर (कसबेगव्हाण), सैदापूर (कसबेगव्हाण), तर चौसाळा गणामधील डोंगरगाव (तुरखेड) व भंडारज गणामधील मलकापूर बु, अडगाव खाडे, नवापूर (अडगाव खाडे), मासमापूर (अडगाव खाडे), मूर्तिजापूर घोगर्दा (अडगाव खाडे), हसनापूर पार्टी, शिरजगाव (हसनापूर पार्टी), कारला, निमखेड आडे (कारला), जवडी, धुडकी गावांची नावे यादीत नाहीत.