Accident News : अक्कलकोट–गाणगापूर महामार्गावर भीषण अपघात! डंपरच्या जोरदार धडकेत एसटी बसचा चक्काचूर; दोघांचा जागीच मृत्यू

अक्कलकोट तालुक्यातील दुधनीजवळील रुद्देवाडी गावाजवळ अक्कलकोट–गाणगापूर महामार्गावर आज सकाळी भीषण अपघात घडला. एसटी बस आणि मुरूमने भरलेल्या डंपरमध्ये झालेल्या जोरदार धडकेत दोन जणांचा जागीच मृत्यू झाला असून अनेक प्रवासी गंभीर जखमी झाले आहेत. या घटनेमुळे परिसरात मोठी खळबळ उडाली आहे.

मिळालेल्या माहितीनुसार, अक्कलकोटहून गाणगापूरकडे प्रवासी घेऊन जाणारी एसटी बस नियमित प्रवास करत असताना समोरून येणाऱ्या डंपरने अचानक नियंत्रण सुटल्यामुळे बसला जोरदार धडक दिली. धडक इतकी भीषण होती की एसटी बसच्या पुढील भागाचा अक्षरशः चुराडा झाला. अपघातानंतर काही क्षणातच डंपरने पेट घेतल्याने परिस्थिती आणखी गंभीर बनली

अपघाताच्या वेळी बसमध्ये प्रवासी होते. धडकेमुळे अनेक प्रवासी सीटवरून खाली फेकले गेले. काही प्रवाशांना किरकोळ जखमा झाल्या असल्या तरी अनेकांची प्रकृती चिंताजनक असल्याचे सांगण्यात येत आहे. घटनास्थळी उपस्थित नागरिकांनी तत्काळ मदतकार्य सुरू करत जखमींना बाहेर काढले आणि रुग्णवाहिकांच्या सहाय्याने अक्कलकोट येथील शासकीय रुग्णालयात हलवण्यात आले.

या अपघातात दोन जणांचा जागीच मृत्यू झाला असून त्यांची ओळख पटवण्याचे काम सुरू आहे. अपघातानंतर काही वेळ वाहतूक ठप्प झाली होती. माहिती मिळताच दक्षिण अक्कलकोट पोलीस ठाण्याचे अधिकारी आणि कर्मचारी तात्काळ घटनास्थळी दाखल झाले. त्यांनी परिस्थिती नियंत्रणात आणत वाहतूक सुरळीत करण्याचे काम हाती घेतले.

दरम्यान, या भीषण अपघाताचे नेमके कारण काय, याचा तपास पोलीस करत आहेत. प्राथमिक अंदाजानुसार डंपर चालकाचे नियंत्रण सुटल्यामुळे हा अपघात घडल्याची शक्यता व्यक्त केली जात आहे. या घटनेमुळे महामार्गावरील सुरक्षिततेचा प्रश्न पुन्हा एकदा ऐरणीवर आला असून वाहनचालकांनी अधिक सतर्कतेने वाहन चालवण्याचे आवाहन करण्यात येत आहे.