'भाजपच्या भ्रष्टाचाराच्या फाईलमुळे अजितदादांचा घात'; विमान पडलं की पाडलं? संजय राऊतांना संशय

अजितदादांच्या विमान अपघाताबद्दल शंकांचं काहूर माजलंय. दुसरीकडे संजय राऊतांनी तर थेट भाजपचं नाव घेत दादांच्या अपघातामागे षडयंत्र असल्याचा खळबळजनक आरोप केलाय. भाजपच्या भ्रष्टाचाराच्या फाईलमुळेच दादांचा घात झालाय का? असा सवाल राऊतांनी केलाय..एवढंच नाही तर बॉडी जळून खाक झाल्या मग कागद न जळण्यावरही राऊतांनी सवाल उपस्थित केलाय.

तर या प्रकरणी राऊतांनी थेट आंतरराष्ट्रीय कोर्टात पुरावे द्यावेत, असा पलटवार भाजपनं केलाय. फक्त राऊतच नव्हे तर पवारांच्या राष्ट्रवादीचे नेते अनिल देशमुख यांनी तर थेट व्हिजिबिलिटी कमी असल्याच्या कारणावरच प्रश्न उपस्थित केलाय. यात विरोधकच नाही तर सत्ताधारी आणि अजितदादांच्या राष्ट्रवादीच्या नेत्यांनीही धुक्यामुळे नाही तर धोक्यामुळे दादांचा मृत्यू झाल्याचं म्हटलंय.. तर शंकांचं निरसन करण्यासाठी चौकशी करण्याचं आश्वासन गृह राज्यमंत्री पंकज भोयर यांनी दिलंय.

खरंतर 1995 ते 1999 दरम्यान पुरंदर उपसा सिंचन योजनेची किंमत जाणीवपूर्वक वाढवल्याचा आरोप अजित पवारांनी भाजपवर केला होता. एवढंच नाही तर त्याची फाईल आपल्याकडे असल्याचं म्हटलं होतं. आता त्याच फाईलचा संदर्भ देत राऊतांनी थेट भाजपला घेरलंय.. त्यामुळे संशयाची सुई दूर करण्यासाठी भाजप स्वतःहून अजित पवारांच्या अपघाताच्या न्यायालयीन चौकशीचे आदेश देणार का? आणि या प्रकरणातील सत्य महाराष्ट्राच्या समोर आणणार का? याकडे राज्याचं लक्ष लागलंय.