Ahmednagar News: दसरा-दिवाळीच्या तोंडावर १५०० कुटुंबांवर बेघर होण्याची वेळ; रेल्वेकडून जागा खाली करण्याची नोटीस

सचिन बनसोडे 

श्रीरामपूर (अहमदनगर) : अहमदनगरच्या श्रीरामपूर शहरातील बेलापूर रेल्वे स्थानकाच्या रेल्वे मार्गाच्या विस्तारीकरण केले जाणार आहे. याकरिता (Shrirampur) श्रीरामपूर शहरातील तब्बल दीड हजाराहून अधिक घरे आणि व्यावसायिकांना जागा खाली करण्याच्या रेल्वे (Railway) विभागाने नोटिस बजावल्या आहेत. १०० वर्षापासून वास्तव्य असताना आणि स्वतःच्या नावे उतारे असताना रेल्वे विभागाने बजवालेल्या नोटिसा बेकायदेशीर असल्याचा आरोप स्थानिक नागरिकांनी केला. (Tajya Batmya)

श्रीरामपूर शहरातील बेलापूर रेल्वे स्थानकाच्या परिसरातील ५ किलोमीटर अंतराचे विस्तारीकरण करण्यासाठी आजूबाजूच्या भागात असलेल्या १५०० हून अधिक घरे आणि व्यावसायिकांना नोटिस बजावल्याने शहरात एकच खळबळ उडाली आहे. पीपीई ऍक्ट १९७१ नुसार या नोटिसा बजावण्यात आल्या असून यापूर्वी एकही नोटीस न देता थेट कलम ५ नुसार घरे आणि दुकाने खाली करण्याच्या नोटिसा बजावल्या आहेत. 

या परिसरात १०० वर्षांपासून वास्तव्य असणारे नागरिक राहतात. अनेकांच्या नावे स्वतःचे उतारे सुद्धा आहेत. तर शहराचा डीपी प्लॅन सुद्धा मंजूर असून झालेली बांधकामे नियमानुसार पालिकेची परवानगी घेऊन करण्यात आली आहेत. असे असताना अचानक आलेल्या नोटिसमुळे स्थानिकांना केंद्र आणि राज्य शासन न्याय देणार का ? असा सवाल नागरिकांनी केला. तर भविष्यात या विषयाला धरून जनआंदोलन उभारण्याचा इशारा नागरिकांनी दिला.

गेल्या महिन्याच्या अखेरीला या नोटिस प्राप्त झाल्यानंतर आता नागरिकांची धावपळ सुरू झाली. जिल्ह्यातील दोन्ही खासदारांना याबाबत निवेदन देण्यात आले असून केंद्र सरकारने यात हस्तक्षेप करून मार्ग काढण्याची विनंती केली. माझ्याकडे नागरिक आले असून शिर्डीचे खासदार सदाशिव लोखंडे आणि मि एकत्र येऊन बैठक घेऊ आणि रेल्वे राज्यमंत्री रावसाहेब दानवे यांच्याकडे पाठपुरावा करू असे आश्वासन भाजपचे खासदार सुजय विखे यांनी दिले आहे. तर भाजप श्रीरामपूर नागरिकांच्या पाठीशी असून कुणावरही अन्याय होऊ देणार नाही अशी भूमिका स्थानिक भाजप नेत्यांनी घेतली आहे.