Maharashtra Election: विदर्भावरून मविआत तणाव? मविच्या बैठकीत खडाजंगी?

भरत मोहळकर, साम प्रतिनिधी

विधानसभा निवडणूक जाहीर झाली असली तरी महाविकास आघाडीत विदर्भातील 12 जागांवरून वाद विकोपाला गेलाय.. त्यातच संजय राऊतांनी महाविकास आघाडीची तब्बेत बरी असली तरी एक्स रे, एमआरआय करावा लागण्याचं सूचक वक्तव्य केल्याने संदिग्धता आणखीच वाढलीय. तर राऊतांच्या भुमिकेवर रोहित पवारांनी सारवा-सारव करण्याचा प्रयत्न केलाय.

संजय राऊतांनी महाविकास आघाडीचा एक्स रे आणि एमआरआय करायची गरज असल्याचं वक्तव्य केल्याने विरोधकांच्या हाती आयतं कोलित मिळालंय. महाविकास आघाडीत जागा वाटपावरून हाणामारी होण्याची शक्यता बावनकुळेंनी व्यक्त केलीय.विदर्भातील कोणत्या जागांवरून महाविकास आघाडीतील वाद पेटलाय? पाहूयात.

विदर्भातील 12 जागांवर मविआत वाद?

1. आरमोरी

2. गडचिरोली

3. गोंदिया

4. भंडारा

5. चिमूर

6. बल्लारपूर

7. चंद्रपूर

8. रामटेक

9. कामठी

10. दक्षिण नागपूर

11. अहेरी

12. भद्रावती वरोरा

मविआत काँग्रेस आणि ठाकरे गटातील वाद विकोपाला गेल्याने तोडगा काढण्यासाठी पवार पुढे सरसावलेत. तर आदित्य ठाकरे आणि काँग्रेसच्या नेत्यांनीही पवारांची भेट घेतलीय. त्यामुळे शरद पवारांना या वादात तोडगा काढण्यात यश मिळणार का? यावर मविआच्या विजयाचं गणित अवलंबून असणार आहे.