सातारा, ता. ४ जून २०२४
देशभरातील लोकसभा निवडणुकांचे निकाल समोर येत आहेत. नुकताच सातारा लोकसभा मतदार संघातील लढतीचा निकाल समोर आला असून भाजप उमेदवार उदयनराजे भोसले यांनी विजयाचा गुलाल उधळला आहे.
साताऱ्याचा खासदार ठरला!
सातारा लोकसभा मतदार संघांसाठी भारतीय जनता पक्षाकडून छत्रपती उदयनराजे भोसले विरुद्ध राष्ट्रवादी शरदचंद्र पवार पक्षाचे नेते शशिकांत शिंदे यांच्यामध्ये सामना झाला. उदयनराजे भोसले गत निवडणुकीत झालेल्या पराभवाचा वचपा काढणार की शशिकांत शिंदे जोर का झटका देणार? याबाबत सर्वांनाच उत्सुकता होती. अखेर साताऱ्याचा खासदार निश्चित झाला असून उदयनराजे भोसले यांनी मुसंडी मारत दिल्लीचे तिकीट मिळवले आहे.
उदयनराजेंविरुद्ध शशिकांत शिंदेंमध्ये लढत!
तत्पुर्वी सातारा लोकसभेसाठी महायुती तसेच महाविकास आघाडीमध्ये उमेदवारीवरुन बराच संभ्रम निर्माण झाला होता. भाजपकडून उदयनराजे भोसले यांची उमेदवारी निश्चित मानली जात होती मात्र पक्षाकडून ताटकळत ठेवल्याने राजेंना दिल्लीत मुक्काम ठोकावा लागला होता. दुसरीकडे मावळते खासदार श्रीनिवास पाटील यांनी निवडणूक लढण्यास नकार दिल्याने शरद पवार यांच्यापुढेही उमेदवार देण्याचे आव्हान होते.
अगदी अखेरच्या क्षणी राष्ट्रवादी काँग्रेस शरदचंद्र पवार पक्षाकडून कोरेगावचे माजी आमदार शशिकांत शिंदे यांना तिकीट देण्यात आले. त्यानंतर भाजपनेही उदयनराजे भोसलेंच्या उमेदवारीची घोषणा केली. तिकीट वाटपापासून ते प्रचाराच्या धडाक्यांनी गाजलेल्या या हायहोल्टेज लढतीत अखेर उदयनराजे भोसलेयांनी बाजी मारत साताऱ्याचा गड राखण्याचा पराक्रम केला आहे.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.