Maharashtra Politics: ब्रेकिंग! भाजपकडून विधानपरिषदेचे ३ उमेदवार जाहीर, कोकण पदवीधरसाठी तिरंगी लढतीची शक्यता

वैदेही कानेकर मुंबई|ता. ३ जून २०२४

लोकसभा निवडणुकांनंतर आता राज्याच्या राजकारणात विधानसभा परिषदांच्या निवडणुकांचे वेध लागले आहेत. आज शिवसेना शिंदे गटाकडून शिवसेनेचे सचिव संजय मोरे यांनी कोंकण पदवीधर मतदारसंघ निवडणूकीकरिता उमेदवारी अर्ज घेतला आहे. तर भारतीय जनता पक्षाकडून निरंजन डावखरे यांना संधी देण्यात आली आहे. त्यामुळे कोकण पदवीधर मतदार संघात तिरंगी लढत होण्याची शक्यता आहे.

याबाबत अधिक माहिती अशी की, शिवसेना पक्षाकडून शिवसेनेचे सचिव संजय मोरे यांनी कोकण पदवीधर मतदारसंघ निवडणूकीकरिता कोकण भवन येथून उमेदवारी अर्ज घेतला आहे. तर भारतीय जनता पक्षाकडून निरंजन डावखरे यांना उमेदवारी जाहीर करण्यात आली आहे. मनसेकडून अभिजित पानसे यांना आधीच उमेदवारी जाहीर करण्यात आली आहे. त्यामुळे कोकणात तिरंगी लढत होण्याची शक्यता आहे.

भारतीय जनता पक्ष विधानपरिषदेच्या तीन जागा लढवणार असल्याचे स्पष्ट झाले आहे. मुंबई शिक्षक व पदवीधरसहित कोकण पदवीधरवर भाजपकडून उमेदवार घोषित करण्यात आले आहेत. यामध्ये कोकण पदवीधर मध्ये निरंजन डावखरेंना पुन्हा संधी देण्यात आली आहे. तर मुंबई शिक्षकमध्ये शिवनाथ दराडे आणि मुंबई पदवीधरमध्ये किरण शेलार यांना संधी देण्यात आली आहे. रमेश कीर यांना कोकण पदवीधर मधून काँग्रेसने उमेदवारी जाहीर केली आहे.

दरम्यान, शिवसेना उध्दव बाळासाहेब ठाकरे पक्षाचे नेते अनिल परब मुंबई पदवीधरसाठी आज भरणार उमेदवारी अर्ज दाखल करणार आहेत. तसेच शिवसेना ठाकरे गटाचे मुंबई शिक्षक मतदार संघाचे उमेदवार ज. मो अभ्यंकर सुद्धा आज आपला उमेदवारी अर्ज कोकण भवन येथे जाऊन भरणार आहेत.