Pune Loksabha: रविंद्र धंगेकरांसाठी काँग्रेसचे दिग्गज मैदानात; राहुल गांधी- प्रियांका गांधी पुण्यात रोड शो करणार!

सचिन जाधव, पुणे|ता. ११ एप्रिल २०२४

Pune Loksabha Constituency News:

राज्यात सध्या लोकसभा निवडणुकांची रणधुमाळी सुरू आहे. पुण्यामध्ये काँग्रेसकडून आमदार रविंद्र धंगेकर आणि भाजपचे मुरलीधर मोहोळ यांच्यामध्ये थेट लढत होणार आहे. एकीकडे मुरलीधर मोहोळ यांच्यासाठी भाजप नेत्यांनी कंबर कसली असताना आता रविंद्र धंगेकर यांच्या प्रचारासाठी काँग्रेस नेते खासदार राहुल गांधी तसेच प्रियांका गांधीही मैदानात उतरणार आहेत.

पुणे लोकसभा मतदार संघासाठी महाविकास आघाडीकडून (Mahavikas Aaghadi) काँग्रेसचे आमदार रविंद्र धंगेकर यांना उमेदवारी देण्यात आली आहे. रविंद्र धंगेकर यांच्यासमोर भाजपचे मुरलीधर मोहोळ यांचे आव्हान आहे. तसेच नुकतेच मनसेमधून वंचित आघाडीमध्ये गेलेले वसंत मोरे यांचेही कडवे आव्हान पाहायला मिळणार आहे. रवींद्र धंगेकरांसाठी राहुल गांधी मैदानात उतरणार आहेत.

लवकरच काँग्रेस उमेदवार रवींद्र धंगेकर यांच्या प्रचारार्थ राहुल गांधी (Rahul Gandhi) यांच्यासह प्रियांका गांधी, आणि आदित्य ठाकरे पुण्यात रोड शो करणार आहेत. तसेच राष्ट्रवादी काँग्रेसचे अध्यक्ष शरद पवार आणि शिवसेना पक्षप्रमुख उद्धव ठाकरेंची देखील पुण्यात सभा होणार असल्याची माहिती काँग्रेस पदाधिकाऱ्यांनी दिली आहे.

दरम्यान, आज राष्ट्रवादी काँग्रेस शरदचंद्र पवार (NCP) पक्षात मोठा पक्ष प्रवेश होण्याची शक्यता आहे. नुकताच भाजपला रामराम ठोकलेले शिरूर चे भाजप नेते आणि जिल्हा परिषद सदस्य अतुल देशमुख शरद पवार गटात प्रवेश करण्याची शक्यता आहे. पक्षाचे अध्यक्ष शरद पवार यांच्या उपस्थितीत प्रवेश होणार असल्याचे सांगण्यात येत आहे.

(साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)