Pav Bhaji Without Tomato : टोमॅटो महागले, तरी पावसाळ्यात बनवा चटपटीत पावभाजी! वापरा 'ही' भन्नाट युक्ती

सध्या टोमॅटोचे भाव वाढले आहेत. अशात सर्वसामान्यांना जेवण बनवताना टोमॅटोची कमतरता भासत आहे. पावसाळ्यात अनेकांना चटपटीत खाण्याचा मोह होतो. अशात आपण जर पावभाजीचा बेत आखला. तर 'टोमॅटो शिवाय पावभाजी कशी करायची?' असा प्रश्न पडतो. पण आता महागाईची झळ जिभेची चव पुरवताना आड येणार नाही. तुम्ही टोमॅटोशिवाय चटपटीत पावभाजी बनवू शकता.

टोमॅटोची आंबट चव पावभाजीचा स्वाद वाढवते. टोमॅटो शिवाय हा स्वाद आपण पावभाजीला आणू शकतो. यासाठी तुम्हाला टोमॅटो ऐवजी बीटरुटचा वापर करावा लागेल.

टोमॅटो शिवाय 'अशी' बनवा पावभाजी

साहित्य

• भाजी : कांदा, फ्लॉवर ,बटाटा, वाटाणे, शिमला मिरची

• मसाला : आलं लसूण पेस्ट, लाल मिरची पावडर, पावभाजी मसाला, कोथिंबीर, मीठ, आमचूर पावडर

• बीट

• तूप

• लिंबू

• दही

कृती

पावभाजी बनवण्यासाठी सर्वप्रथम शिमला मिरची, बीट, फ्लॉवर आणि बटाटा बारीक कापून घ्या. हिरव्या वाटाण्यांसोबत कुकरला या भाज्या उकडून घ्या. भाज्या उकडताना मीठ घालायला विसरू नका. तुमच्या आवडीनुसार यात इतर भाज्या देखील तु्म्ही टाकू शकता. उकडलेल्या भाज्या थंड झाल्यावर बारीक मॅश करून घ्या. आता दुसऱ्या बाजूला एका पॅनमध्ये तूप गरम करून त्यात बारीक चिरलेला कांदा घालून गोल्डन फ्राय होईपर्यंत छान मिक्स करून घ्या. या मिश्रणात ‌आलं-लसणाची पेस्ट, लाल मिरची पावडर, पावभाजी मसाला, मीठ, आमचूर पावडर , लिंबू आणि दही घालून सर्व मिक्स करून घ्या. लिंबू आणि दहीमुळे पावभाजीची चव आणखी वाढेल. तसेच बीटमुळे पावभाजीला चांगला रंग येईल. मसाल्यांना छान तेल सुटल्यावर त्यात सर्व भाज्या टाकून पाणी घालून छान उकळी येऊ द्या. सर्वात शेवटी कोथिंबीर घाला. पावसात गरमागरम पावभाजीचा आस्वाद घ्या.