Urine symptoms of kidney failure: लघवीद्वारे 'ही' लक्षणं दिसली तर समजा किडनी फेल झालीये; बदल ओळखून वेळीच उपचार घ्या

जर तुम्हाला दिवसभर खूप थकवा आणि अशक्तपणा जाणवत असेल तर ते शरीरातील पोषक तत्त्वांच्या कमतरतेमुळे होऊ शकतं. परंतु यासोबत पाय सुजणं, लघवीचा रंग बदलणं अशी लक्षणं दिसू लागली, तर ते गंभीर मानणे आवश्यक आहे. हे किडनी फेल होण्याचे किंवा किडनीसंबंधी इतर आजाराचे संकेत असू शकतात.

भारतातील परिस्थिती

भारतीय आयुर्विज्ञान संशोधन परिषद (ICMR) च्या अहवालानुसार, दरवर्षी भारतात सुमारे दोन लाखांहून अधिक लोकांचा मृत्यू किडनीच्या आजारांमुळे होतो. त्यामुळे किडनीच्या आरोग्याकडे दुर्लक्ष करणं हे मोठ्या संकटाला आमंत्रण देणारे ठरू शकते.

किडनीचे दोन प्रमुख आजार

नेफ्रोलॉजी विभागाचे प्रमुख डॉ. संजीव सक्सेना यांच्या मते, किडनीचे आजार दोन प्रकारचे असतात यामध्ये अक्यूट किडनी डिसीज आणि क्रॉनिक किडनी डिसीज यांचा समावेश आहे.

अक्यूट किडनी डिसीज

ही अचानक होणारी समस्या आहे. शारीरिक दुखापत किंवा संसर्गामुळे ती उद्भवू शकते. काही तासांत किंवा काही दिवसांत ती वाढते पण योग्य उपचारांमुळे ती बरी होऊ शकते.

क्रॉनिक किडनी डिसीज

हा दीर्घकाळ टिकणारा आजार आहे. यामध्ये हळूहळू किडनीची कार्यक्षमता कमी होत जाते. मधुमेह आणि उच्च रक्तदाब असलेल्या रुग्णांना या आजाराचा धोका अधिक असतो.

लघवीतील बदल हे महत्वाचे संकेत

किडनी फेल होण्याची सुरुवातीची लक्षणं हलकी असतात. त्यामुळे अनेकदा लोक त्याकडे दुर्लक्ष करतात. परंतु लघवीच्या पद्धतीत बदल होणं, लघवीचा रंग बदलणं किंवा लघवीतून रक्त येणं ही किडनी आजाराची महत्त्वाची चिन्हं आहेत.

किडनी फेल होण्याची मुख्य लक्षणं

किडनी फेल झाल्यास शरीरात प्रचंड थकवा आणि कमजोरी जाणवते. पायांमध्ये सूज येते त्याचप्रमाणे लघवीत काही विशिष्ट बदल दिसून येतात. अशी लक्षणंआढळल्यास त्वरित डॉक्टरांचा सल्ला घेणं गरजेचं आहे.

किडनी आरोग्य राखण्यासाठी उपाय

किडनी निरोगी ठेवण्यासाठी योग्य जीवनशैली आवश्यक आहे. नियमित व्यायाम, संतुलित आहार, कमी मीठ आणि कमी साखरेचा वापर, त्याचप्रमाणे पुरेसे पाणी पिणं या गोष्टी महत्त्वाच्या आहेत. याशिवाय नियमित रक्तदाब आणि रक्तातील साखरेची तपासणी करून घेणं गरजेचं आहे.

किडनीसाठी घातक सवयी

काही चुकीच्या सवयी किडनीवर वाईट परिणाम करतात. धूम्रपान ही त्यापैकी सर्वात धोकादायक सवय आहे. धूम्रपानामुळे केवळ फुफ्फुसांचे नव्हे तर किडनीचे कार्यही बिघडतं. जास्त मद्यपान टाळावं कारण त्यामुळे उच्च रक्तदाब आणि इतर समस्या निर्माण होऊ शकतात. त्याचप्रमाणे जास्त मीठ आणि साखर यांचं सेवन टाळणंही किडनीच्या आरोग्यासाठी आवश्यक आहे.

टीप : वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं समर्थन अथवा दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या सल्ल्यानं घ्यावीत.