Diabetes : डायबिटीज होईल कंट्रोल, रोजची फक्त १५ मिनिटांची 'ही' सवय लावून घ्या; औषध न घेता रक्तातील साखर होऊ शकते कमी

Blood Sugar Control : मधुमेहाच्या रुग्णांसाठी रक्तातील साखर नियंत्रणात ठेवणे अत्यंत महत्त्वाचे आहे. योग्य आहार, नियमित व्यायाम आणि वेळेवर औषधे घेणे या गोष्टी मधुमेह नियंत्रणासाठी गरजेचे आहे.
Blood Sugar Control
DiabetesAI PHOTO
Published On: 
Summary

डायबिटीजच्या रुग्णांनी शुगर कंट्रोलमध्ये ठेवा

शारीरिक हालचाल रक्तातील साखर नियंत्रणात ठेवण्यास मदत करते

साखरयुक्त पदार्थांचे प्रमाण कमी करा

मधुमेह, डायबिटीज ही जगभरात वेगाने वाढणारी आरोग्य समस्या आहे. लहान वयापासून ते ज्येष्ठ नागरिकांपर्यंत अनेकजण या आजाराचा सामना करत आहेत. मधुमेह नियंत्रणात ठेवण्यासाठी औषधे, योग्य आहार आणि नियमित व्यायाम यांना विशेष महत्त्व आहे. मात्र, रक्तातील साखर नियंत्रणात ठेवण्यासाठी तुम्हाला नेहमीच कठीण व्यायाम करण्याची गरज नाही. दररोज फक्त १० ते १५ मिनिटे चालण्याची साधी सवयही फायदेशीर ठरू शकते. आरोग्य तज्ज्ञांच्या मते, चालताना शरीरातील स्नायू रक्तातील ग्लुकोजचा वापर अधिक प्रमाणात करतात. त्यामुळे रक्तातील साखरेची पातळी कमी होण्यास मदत मिळू शकते. विशेष म्हणजे, जेवणानंतर थोडा वेळ चालल्यास रक्तातील साखरेची अचानक वाढ नियंत्रित ठेवण्यासही मदत मिळते.

चालणे अन् शुगर कंट्रोल

चालणे हा अतिशय साधा व्यायाम असला तरी त्याचा शरीराच्या चयापचय प्रक्रियेवर सकारात्मक परिणाम होतो. आपण चालायला सुरुवात करतो, तेव्हा शरीरातील स्नायूंना काम करण्यासाठी अधिक ऊर्जेची गरज भासते. ही ऊर्जा मिळवण्यासाठी स्नायू रक्तातील ग्लुकोजचा वापर करतात. म्हणजेच चालताना स्नायू रक्तातील अतिरिक्त साखर शोषून घेण्यास मदत करतात. यामुळे रक्तातील ग्लुकोजची पातळी कमी होऊ शकते. विशेषतः टाइप २ मधुमेह आणि प्री-डायबिटीज असलेल्या व्यक्तींना लहान आणि नियमित वॉकचा फायदा होऊ शकतो. याशिवाय चालण्यामुळे वजन नियंत्रणात ठेवण्यास, हृदयाचे आरोग्य सुधारण्यास आणि दिवसभर उत्साही राहण्यास मदत मिळते.

दररोज १५ मिनिटे चालण्याचे फायदे

इन्सुलिनची संवेदनशीलता सुधारते

नियमित चालण्यामुळे शरीरातील स्नायू ग्लुकोजचा अधिक प्रभावीपणे वापर करू शकतात. त्यामुळे इन्सुलिनला शरीराचा प्रतिसाद सुधारण्यास मदत मिळते. परिणामी इन्सुलिन रेसिस्टन्सचा धोका कमी करण्यास हातभार लागू शकतो.

पोटावरील चरबी कमी होते

पोटाभोवती जमा होणारी अतिरिक्त चरबी इन्सुलिन रेसिस्टन्सशी संबंधित असते. नियमित चालण्यामुळे कॅलरीज खर्च होतात आणि वजन नियंत्रणात ठेवण्यास मदत मिळते. याचा मधुमेह नियंत्रणावरही सकारात्मक परिणाम होऊ शकतो.

Blood Sugar Control
Winter Asthma : थंडीत रात्री अचानक श्वास घेण्यास होतोय त्रास? दम्याच्या रुग्णांनी चुकूनही करू नका 'या' ३ चुका

जेवणानंतर वाढणारी साखर नियंत्रित राहते

जेवणानंतर रक्तातील ग्लुकोजची पातळी वाढते. अशावेळी थोडा वेळ चालल्यास स्नायू ग्लुकोजचा वापर करतात. त्यामुळे जेवणानंतर रक्तातील साखरेत होणारी अचानक वाढ कमी करण्यास मदत मिळू शकते.

तणाव कमी होतो

नियमित चालण्यामुळे मन प्रसन्न राहण्यास आणि तणाव कमी होण्यास मदत होते. तणावाचा परिणाम रक्तातील साखरेच्या पातळीवरही होऊ शकतो. त्यामुळे चालण्याची सवय मानसिक आणि शारीरिक आरोग्यासाठी फायदेशीर ठरते.

चालण्याची सवय लावताना 'या' ७ गोष्टी लक्षात ठेवा

  1. सुरुवातीला दररोज १० ते १५ मिनिटे चाला. शरीराला सवय झाल्यानंतर वेळ हळूहळू वाढवा.

  2. आठवड्यातून किमान १५० मिनिटे मध्यम तीव्रतेचा व्यायाम करण्याचे टार्गेट ठेवा.

  3. सकाळी, दुपारच्या विश्रांतीत किंवा संध्याकाळी चालण्यासाठी वेळ काढा.

  4. सुरुवातीला संथ गतीने चाला. नंतर शरीराच्या क्षमतेनुसार वेग वाढवा.

  5. पायांना आरामदायी आणि योग्य आधार देणारे शूज वापरा. यामुळे पायांवर अनावश्यक ताण येत नाही.

  6. चालण्यापूर्वी आणि नंतर हलके स्ट्रेचिंग केल्यास स्नायूंवरील ताण कमी होण्यास मदत होते.

  7. स्मार्टवॉच, मोबाईल अ‍ॅप किंवा पेडोमीटरच्या मदतीने रोज किती चाललात, याची नोंद ठेवा.

टीप : वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं समर्थन अथवा दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या, डॉक्टरांच्या सल्ल्यानं घ्यावीत.

सकाळ+चे सदस्य व्हा

शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.

Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.