High Blood Pressure: हाय ब्लड प्रेशरच्या रुग्णांनी कोणतं मीठ आहारात वापरावं? जाणून घ्या मीठाचा शरीरावर होणारा परिणाम

उच्च रक्तदाब म्हणजेच हाय ब्लड प्रेशर हा आजच्या काळातला एक गंभीर आजार बनला आहे. बदललेली जीवनशैली, ताणतणाव आणि चुकीचा आहार यामुळे अनेकांना या समस्येला सामोरे जावं लागतं. यामध्ये रोजच्या आहारात वापरलं जाणारं मीठ (Salt) आणि त्यातलं सोडियम (Sodium) हे तुमच्या उच्च रक्तदाबावर थेट परिणाम करतं.

त्यामुळे हाय बीपी असलेल्या व्यक्तींनी रोजच्या आहारात कोणतं मीठ वापरलं पाहिजे? याबाबत अनेकदा संभ्रम असतो. पुढे डॉक्टरांनी दिलेल्या सल्ल्यानुसार आपण याचं उत्तर जाणून घेणार आहोत.

बऱ्याच लोकांना वाटतं की, समुद्री मीठ, कोषेर मीठ किंवा हिमालयन पिंक सॉल्ट हे साध्या मिठापेक्षा जास्त फायदेशीर असतं. पण तज्ज्ञांच्या मते, मीठ कोणतंही असो, त्यातल्या सोडियमचं प्रमाण जवळपास सारखंच असतं. जास्त सोडियम शरीरात पाणी साठवतं, त्यामुळे रक्ताचं प्रमाण वाढतं आणि त्याचा थेट परिणाम रक्तदाब वाढण्यावर होतो. जास्त मीठ खाल्याने हृदयविकार आणि स्ट्रोकचा धोका वाढू शकतो.

टेबल सॉल्ट, समुद्री मीठ, कोषेर मीठ किंवा हिमालयन पिंक सॉल्ट यामध्ये फारसा आरोग्याच्या दृष्टीने फरक नसतो. फरक असतो तो फक्त चवीचा आणि कणांच्या आकारांचा. त्यामुळे हाय ब्लड प्रेशर असलेल्या रुग्णांनी मीठाचा प्रकार बदलण्याऐवजी त्याचे प्रमाण कमी करणं जास्त महत्त्वाचं आहे. तज्ज्ञांच्या मते, दिवसाला २३०० मिलीग्रॅमपेक्षा कमी सोडियम सेवन करणं आरोग्यासाठी योग्य ठरते.

उच्च रक्तदाब नियंत्रणात ठेवण्यासाठी घरचं ताजं अन्न, कमी मीठ, कमी प्रक्रिया केलेले पदार्थ, हिरव्या भाज्या, फळं आणि पोटॅशियमयुक्त आहार घ्या. मसाले, औषधी वनस्पती, लिंबू, लसूण यांचा वापर करून चव वाढवता येते. काही लो-सोडियम किंवा पोटॅशियम सॉल्ट पर्याय उपलब्ध असले तरी ते वापरण्यापूर्वी डॉक्टरांचा सल्ला घेणं आवश्यक आहे.