Marathi Serial : सूडाची प्रेम कहाणी घेऊन 'ती' आली...; नव्या मराठी मालिकेची सोशल मीडियावर तुफान चर्चा, VIDEO

सध्या प्रेक्षकांचे मनोरंजन करण्यासाठी अनेक नव्या मालिका सुरू होताना दिसत आहे. अशात झी मराठी वाहिनीने देखील आपल्या नव्या मालिकेची घोषणा केली आहे. या नव्याकोऱ्या मालिकेची सोशल मीडियावर चांगलीच चर्चा रंगली आहे. झी मराठी वाहिनीने बहुप्रतीक्षित 'इच्छाधारी नागीण' या मालिकेची घोषणा करून मु्ख्य अभिनेत्रीचा चेहरा उघड केला आहे.

मीडिया रिपोर्टनुसार, २०२४ मध्ये 'इच्छाधारी नागीण' या मालिकेची घोषणा करण्यात आली होती. त्यानंतर प्रेक्षक या मालिकेची उत्सुकतेने वाट पाहत होते. अलिकडेच 'इच्छाधारी नागीण' मालिकेचा शुभारंभ होऊन सेटवर मुहूर्त पूजा झाली. याचे फोटो सोशल मीडियावर व्हायरल झाले. आता 'इच्छाधारी नागीण' या मालिकेचा नवा व्हिडीओ समोर आला आहे. ज्यात प्रसिद्ध अभिनेत्री गौरी शेळगावकर नागीणीच्या रुपात पाहायला मिळत आहे. गौरीने अनेक हिंदी मालिकांमध्ये काम केले आहे. 'सफल होगी तेरी आराधना', 'बींदणी' या तिच्या गाजलेल्या मालिका आहेत.

'इच्छाधारी नागीण' या मालिकेच्या प्रोमो व्हिडीओला हटके कॅप्शन देण्यात आले आहे. लिहिलं की, "नागलोकाची अद्भूत राणी, रूपाने मोहिनी... लवकरच अवतरणार भूतलावर पूर्ण करण्या तिच्या सूडाची प्रेम कहाणी! इच्छाधारी नागीण - सूडाची प्रेमगाथा..." या प्रोमो व्हिडीओवर नेटकरी भरभरून कमेंट्सचा वर्षाव करत आहे. व्हिडीओत अभिनेत्री नागीणचे रुप घेताना दिसत आहे. अद्याप मालिकेची रिलीज डेट जाहीर झाली नाही. मात्र चाहते उत्सुकतेने शोची वाट पाहत आहेत.

आतापर्यंत हिंदी टिव्ही इंडस्ट्रीत 'नागीण' या मालिकेचे सात भाग पूर्ण झाले आहेत. प्रेक्षकांकडून याला चांगला प्रतिसाद मिळत आहे. एकता कपूरच्या मालिकांनी प्रेक्षकांना वेड लावले. आजवर नागिनच्या भूमिकेत अनेक प्रसिद्ध हिंदी अभिनेत्री झळकल्या आहेत. यात मौनी रॉय, सुरभि ज्योति, अनिता हसनंदानी, निया शर्मा, जैस्मिन भसीन, सुरभि चंदना , प्रियंका चाहर आणि तेजस्वी प्रकाश यांचा समावेश आहे.