Sachin Sanghvi : प्रसिद्ध गायक सचिन सांघवीविरुद्ध गुन्हा दाखल; अत्याचार अन् गर्भपाताचा आरोप, नेमकं प्रकरण काय?

बॉलिवूडमधून धक्कादायक बातमी समोर आली आहे. प्रसिद्ध गायक, संगीतकार सचिन संघवी (Sachin Sanghvi) याच्यावर गंभीर आरोप करण्यात आले आहे. सचिन संघवी याच्यावर एका तरुणीने लैंगिक छळ केल्याचे आरोप केले आहेत. सचिन संघवी याच्या विरुद्ध विलेपार्ले पोलीस स्टेशनमध्ये तक्रार दाखल करण्यात आली आहे. त्याला अटकदेखील करण्यात आली होती. मात्र त्याला जामीन मंजूर करण्यात आला आहे. नेमकं प्रकरण काय, जाणून घेऊयात.

मीडिया रिपोर्टनुसार, पोलिसांनी सचिन संघवी विरुद्ध भारतीय न्याय संहितेच्या कलम 69, 74 आणि 89 अंतर्गत फसवणूक, अत्याचार आणि संमतीशिवाय गर्भपात केल्याबद्दल एफआयआर दाखल केला आहे. महिलेने केलेल्या आरोपानंतर सचिन संघवीला 22 ऑक्टोबरला अटक करण्यात आली. FIRमधील माहितीनुसार, सचिन संघवी विरुद्ध तक्रार विलेपार्ले पूर्व येथे राहणाऱ्या 29 वर्षीय तरुणी गायिकेने केली आहे. पीडित महिलेची 2024 फेब्रुवारीमध्ये सचिन संघवीशी इन्स्टाग्रामवर ओळख झाली. सचिनने तिच्या गाण्याचे, आवाजाचे कौतुक केले. तिला अल्बममध्ये काम करण्याची ऑफर दिली.

कामामुळे एकमेकांचे नंबर घेतले आणि दोघे बोलू लागले. सांताक्रूझ येथील स्टुडिओमध्ये दोघे कामानिमित्त कायम भेटायचे. सचिनने पत्नीला घटस्फोट देऊन पीडितेशी लग्न करण्याचं आश्वासन दिले होते. त्यानंतर एप्रिल 2024मध्ये सचिनने पीडित महिलेसोबत शारीरिक संबंध ठेवले. हे दोघे बुडापेस्ट येथे फिरायला गेले होते. काही काळानंतर महिलेला सचिन संघवी आपल्याला फसवत असल्याचे समजले.

2025 ला पीडित महिलेने सचिन संघवीच्या फोनमध्ये दुसऱ्या महिलेसोबतचे फोटो आणि चॅट्स पाहिले. ज्यामुळे त्यांच्यात वाद झाला. जेव्हा दोघे कामानिमित्त दुबईला गेले तेव्हा महिलेच्या इच्छेविरुद्ध सचिनने तिच्यासोबत संबंध ठेवले. त्यानंतर ती महिला गरोदर राहिली. हे जेव्हा सचिनला समजले तेव्हा त्याने महिलेवर गर्भपातासाठी दबाव टाकला. पीडित महिलेला धमकी दिली की, तिचे फोटो आणि व्हिडीओ सोशल मिडियावर लीक करेन. भीतीमुळे पीडितेने गर्भपात केला आणि सचिन संघवीसोबतचे सर्व संबंध तोडले.