Sangharsh Yoddha Trailer : मनोज जरांगेंच्या "संघर्षयोद्धा"चा ट्रेलर रिलीज

मराठा समाजाला आरक्षण मिळावे, यासाठी मराठा समाजाचे नेते मनोज जरांगे पाटील आंदोलन करीत होते. आजही हे आंदोलन कायम सुरू आहे. संपूर्ण मराठा समाजाला एकत्र घेवून आंदोलन करणाऱ्या मनोज जरांगे पाटील यांचा जीवनप्रवास रुपेरी पडद्यावर प्रेक्षकांना पाहता येणार आहे. सध्या देशात लोकसभा निवडणूक सुरू आहे. त्यामुळे निवडणूक आयोगाने चित्रपटाच्या प्रदर्शनाला स्थगिती दिली होती. अशातच "संघर्षयोद्धा" चित्रपटाचा ट्रेलर सोशल मीडियावर रिलीज करण्यात आला असून निर्मात्यांनी चित्रपटाची रिलीज डेटही जाहीर केलेली आहे.

मराठा आरक्षणासाठी संघर्ष करणाऱ्या मनोज जरांगे पाटील यांचा बायोपिक थिएटरमध्ये, १४ जून २०२४ ला प्रदर्शित होणार आहे. मनोज जरांगे पाटील यांच्या हस्ते अंतरवाली सराटी येथे चित्रपटाचा ट्रेलर प्रदर्शित करण्यात आला आहे. चित्रपटाची घोषणा केल्यापासून चित्रपटाबद्दल प्रेक्षकांना प्रचंड उत्सुकता होती. "संघर्षयोद्धा मनोज जरांगे पाटील" या चित्रपटातून मराठा समाजाचे नेते मनोज जरांगे पाटील यांच्या जीवनावर प्रकाशझोत टाकला जाणार आहे.

ट्रेलरमध्ये प्रेक्षकांना अंतरवाली सराटीपासून मुंबईपर्यंत त्यांनी काढलेल्या रॅलीपर्यंत असे अनेक किस्से पाहायाला मिळणार आहे. चित्रपटामध्ये मनोज जरांगे यांचा जीवनप्रवास, मराठा आंदोलनात त्यांची भूमिका पाहायला मिळणार आहे. मराठा समाजाच्या या कार्यकर्त्याचा बायोपिक आणि आरक्षणासाठीचा संघर्ष समाजापर्यंत पोहोचवण्यासाठी 'संघर्षयोद्धा' मनोज जरांगे पाटील या चित्रपटाची निर्मिती करण्यात येत आहे.

चित्रपटाचं दिग्दर्शन शिवाजी दोलताडे यांनी केलं असून चित्रपटाची निर्मिती गोवर्धन दोलताडे यांच्या सोनाई फिल्म क्रिएशनने केली आहे. चित्रपटाचं लेखन गोवर्धन दोलताडे यांनी केलं आहे. तर सहनिर्माते रामदास मेदगे, विठ्ठल अर्जुन पचपिंड, जान्हवी मनोज तांबे, दत्तात्रय लोहकरे कार्तिक दोलताडे पाटील, नर्मदा सिनेव्हिजन्स हे आहेत. तर डॉ.सुधीर निकम यांनी संवाद आणि पटकथा लिहिली आहे.

चित्रपटात मनोज जरांगे पाटील यांची मध्यवर्ती भूमिका अभिनेता रोहन पाटील यांनी साकारली आहे. या चित्रपटात अभिनेता संदीप पाठक, सागर कारंडे, मोहन जोशी, श्रीनिवास पोकळे, संजय कुलकर्णी, अभिनेत्री सुरभी हांडे, माधवी जुवेकरसह अनेक सेलिब्रिटी मुख्य भूमिकेत दिसणार आहेत.