प्रसिद्ध फिटनेस युट्युबरचा थायलंडमध्ये संशयास्पद मृत्यू, तलावात सापडला मृतदेह

सोशल मीडियावरील बॉडीबिल्डिंग विश्वातील एकेकाळचा सर्वात मोठा आणि प्रसिद्ध चेहरा असलेला अमेरिकन फिटनेस इन्फ्लुएन्सरचा संशयास्पद मृत्यू झाला आहे. कॉनर मर्फी असं युट्युबरचा नाव आहे. थायलंडमध्ये वयाच्या अवघ्या ३२ व्या वर्षी संशयास्पद मृत्यू झाल्याचे वृत्त आहे. थायलंडच्या समूत प्रकान प्रांतातील एका तलावात पोलिसांना कॉनर मायकेल मर्फीचा मृतदेह सापडला. या वृत्तामुळे जगभरातील त्याच्या लाखो चाहत्यांना मोठा धक्का बसलाय.

स्थानिक माध्यमांनी दिलेल्या माहितीनुसार, ही घटना बँकॉकजवळील एका भाड्याने घेतलेल्या आलिशान प्रॉपर्टीमध्ये घडली. कॉनर अचानक विचित्र वर्तन करू लागला. त्यानंतर घरातून बाहेर पडत तो तलावामध्ये शिरला. तो काही वेळ पोहताना दिसला आणि अचानक पाण्याच्या खाली गायब झाला. माहिती मिळताच रेस्क्यू डायव्हर्सनी शोधमोहीम राबवून त्याला बाहेर काढले. मात्र तोपर्यंत त्याचा मृत्यू झाला होता.

प्राथमिक तपासणीत त्याच्या शरीरावर कोणत्याही हल्ल्याच्या खुणा आढळलेल्या नाहीत. मृत्यूचे नेमके कारण शोधण्यासाठी पोस्ट मॉर्टमसाठी मृतदेह पाठवण्यात आला आहे. कॉनरच्या मैत्रिणीने पोलिसांना सांगितले की, घटनेपूर्वी त्याने कोणत्याही अंमली पदार्थांचे सेवन केले नव्हते आणि त्याने असे वर्तन का केले, याबद्दल तिला कल्पना नाहीये.

कॉनर मर्फी युट्युबवर आपल्या फिटनेस ट्रान्सफॉर्मेशन, बॉडीबिल्डिंग सल्ले आणि प्रँक व्हिडिओ पोस्ट करायचा. त्याच्या जोरावर त्याने करोडो व्ह्यूज मिळवले होते. त्याचे पिळदार शरीर आणि आत्मविश्वास यामुळे तो अल्पावधीतच इन्स्टाग्राम आणि युट्युबवर प्रचंड लोकप्रिय झाला होता.