Monalisa Wedding : मोनालिसानं फरमानसोबत पळून जाऊन केलं लग्न, कुंभमेळ्यामुळे रातोरात झाली होती प्रसिद्ध

महाकुंभ मेळ्यामुळे रातोरात प्रसिद्ध झालेली मोनालिसा (Monalisa Bhosle) कायम कोणत्या ना कोणत्या कारणामुळे चर्चेत असते. मात्र आता मोनालिसा भोसले पुन्हा एकदा चर्चेचा विषय बनली आहे. मोनालिसा भोसलेने मुस्लीम बॉयफ्रेंडसोबत पळून जाऊन लग्न केले आहे. तिच्या लग्नाचे फोटो आणि व्हिडीओ सोशल मीडियावर तुफान व्हायरल होत आहे. 2025 मध्ये उत्तर प्रदेशातील प्रयागराज येथे महाकुंभ मेळा आयोजित करण्यात आला होता. कुंभमेळ्यात मोनालिसा रूद्राक्ष माळा विकायची.

मोनालिसाने आंतरधर्मीय लग्न केले आहे. मोनालिसाने तिचा बॉयफ्रेंड फरमान खानसोबत लग्न केले आहे. दोघांनी केरळमध्ये लग्नगाठ बांधली. मोनालिसा मूळची मध्य प्रदेशातील इंदूरची आहे. तर फरमान खान मूळचा महाराष्ट्रातील आहे. तसेच तो अभिनेता आणि मॉडेल आहे. मोनालिसाच्या लग्नाला तिच्या कुटुंबाचा विरोध होता, त्यामुळे मोनालिसा आणि फरमानने घरच्यांच्या विरोधात पळून जाऊन लग्न केले. मोनालिसा आणि फरमानने आधी कोर्ट मॅरेज केले. त्यानंतर तिरुवनंतपुरम येथील अरुमानूर नैनार मंदिरात लग्न केले.

व्हायरल व्हिडीओत फरमान मोनालिसाच्या गळ्यात मंगळसूत्र घालताना दिसत आहे. तसेच त्यांच्या हातात कोर्टातून मिळालेले लग्नाचे प्रमाणपत्र देखील दिसत आहे. 11 मार्चला दोघं विवाह बंधनात अडकले. कुटुंबामुळे मोनालिसाने पोलीसांकडे संरक्षणाची मागणी केली आहे.

मोनालिसा-फरमान लव्ह स्टोरी

मीडिया रिपोर्टनुसार, मोनालिसा आणि फरमान यांची ओळख दीड वर्षापूर्वी फेसबुकवर झाली. ती दोघे बोलू लागले. त्यांच्यात चांगली मैत्री झाली त्यानंतर मैत्रीचे रूपांतर हळूहळू प्रेमात झाले. दोघेही वेगळ्या धर्माचे असल्यामुळे त्यांच्या नात्याला कुटुंबाने विरोध केला. तसेच मोनालिसाच्या वडीलांनी तिच्यावर त्यांच्या पसंतीच्या मुलाशी लग्न करण्यासाठी दबाव टाकला.

महाकुंभ मेळ्यात मोनालिसाने आपल्या डोळ्यांनी सर्वांचे लक्ष वेधून घेतले. लवकरच ती लवकरच 'नागम्मा' चित्रपटातून प्रेक्षकांच्या भेटीला येणार आहे. चाहते तिच्या चित्रपटाची उत्सुकतेने वाट पाहत आहेत. तसेच चाहते तिच्या लग्नसाठी तिला आणि फरमानला शुभेच्छा देताना दिसत आहेत.