Rakul Preet Singh: लग्नबंधनात अडकणार रकुल प्रीत सिंग, पुढच्या महिन्यात बॉयफ्रेंड जॅकी भगनानीसोबत याठिकाणी घेणार सात फेरे

Rakul Preet Singh Wedding:

2023 हे वर्ष बॉलिवूडमधील (Bollywood) अनेक कलाकारांसाठी खूपच खास ठरले. या वर्षात अनेक सेलिब्रिटींनी धुमडक्यात लग्न करत नव्या आयुष्याला सुरूवात केली. आता 2024 हे नवं वर्ष सुरू झाले आहे. या वर्षात देखील अनेक सेलिब्रिटी विवाहबंधनात अडकणार आहेत. आमिर खानची (Aamir Khan) मुलगी आयरा खान (Ira Khan) जानेवारीच्या पहिल्या आठवड्यात बॉयफ्रेंड नुपूर शिखरेसोबत लग्न करणार आहे. अशामध्ये आता आणखी एक अभिनेत्री लग्न करणार असल्याची बातमी समोर आली आहे. बॉलिवूड अभिनेत्री रकुल प्रित सिंग लवकरच तिचा बॉयफ्रेंड जॅकी भगनानीसोबत लग्न करणार आहे.

रकुल प्रित सिंग ही गेल्या अनेक महिन्यांपासून बॉलिवूड अभिनेता आणि निर्माता जॅकी भगनानीला डेट करत आहे. हे कपल लवकरच लग्न करणार असल्याचे बोलले जात होते. पण आता समोर आलेल्या माहितीनुसार, रकुल आणि जॅकी यांनी लग्न करण्याचा निर्णय घेतला आहे. तर या कपलच्या लग्नाची तारीखही समोर आली आहे. हिंदुस्तान टाईम्सने दिलेल्या वृत्तानुसार, रकुल आणि जॅकी फेब्रुवारीमध्ये गोव्यात लग्न करणार आहेत. एका सूत्राकडून माहिती मिळाली आहे की, रकुल आणि जॅकी 22 फेब्रुवारीला गोव्यात लग्न करणार आहेत. सध्या रकुल आणि जॅकी न्यू इयर सेलिब्रेशनसाठी बँकॉकला गेले असून त्याठिकाणी ते सुट्ट्या इन्जॉय करत आहेत.

रकुल आणि जॅकी यांचे लग्न कसे होणार याबाबत देखील माहिती समोर आली आहे. हे लग्न खासगी पद्धतीने होऊ शकते. या लग्नाला फक्त दोन्ही कुटुंबातील सदस्य, नातेवाईक आणि मित्र परिवार हजेरी लावू शकतात. लग्नापूर्वी हे कपल सध्या सुट्टीचा आनंद घेत आहेत. असे ही म्हटले जात आहे की, जॅकी सध्या बँकॉकमध्ये बॅचलर पार्टीसाठी गेला आहे. तर रकुल देखील थायलंडमध्येच आहे आणि ती सुट्ट्या इन्जॉय करत आहे. दोघांचे देखील न्यू इअर सेलिब्रेशनचे फोटो व्हायरल झाले आहेत.

रकुल प्रीत सिंग आणि जॅकी भगनानी यांनी आपली लव्ह लाईफ कधीही कोणापासून लपलेली नाही. हे कपल 2021 पासून एकमेकांना डेट करत आहे. नेहमी त्यांचे फोटो आणि व्हिडीओ सोशल मीडियावर व्हायरल झाले आहेत. आता हे कपल लग्न करणार असल्याचे कळताच त्यांच्या चाहत्यांना प्रचंड आनंद झाला आहे. रकुल प्रीत सिंगच्या वर्कफ्रंटबद्दल सांगायचे झाले तर, रकुल कमल हासन यांच्यासोबत 'इंडियन 2' मध्ये दिसणार आहे. या चित्रपटाचा प्रीक्वल 1996 मध्ये रिलीज झाला होता. तर जॅकी त्याची पुढील निर्मिती असलेल्या 'बडे मियाँ छोटे मियाँ'च्या रिलीजची वाट पाहत आहे. जफर दिग्दर्शित या चित्रपटात अक्षय, टायगर, सोनाक्षी सिन्हा आणि पृथ्वीराज सुकुमारन प्रमुख भूमिकेत आहेत. 2024 च्या ईदच्या मुहूर्तावर चित्रपट प्रदर्शित होणार आहे.