Manoj Bajpayee : 26 वर्षांनंतरही चित्रपटगृहात धुमाकूळ घालतोय 'सत्या'; गाण्याच्या तालावर थिरकले चाहते,पाहा VIDEO

बॉलिवूड अभिनेता मनोज बाजपेयीने (Manoj Bajpayee) आजवर अनेक हिट चित्रपट केले आहेत.'सत्या' हा त्यांचा चित्रपट खूप गाजला. या चित्रपटाची गाणी आजही प्रेक्षकांना वेड लावत आहे. तर चित्रपटातील डायलॉग प्रेक्षकांना आजही आठवत आहे. 'सत्या' (Satya Movie) हा चित्रपट 1998 मध्ये प्रेक्षकांच्या भेटीला आला होता. या चित्रपटात मनोज बाजपेयी यांनी भिखू म्हात्रेची भूमिका साकारली होती.

'सत्या' चित्रपटाचे मुख्य अभिनेते मनोज बाजपेयी यांनी नुकताच सोशल मीडियावर एक खास व्हिडीओ शेअर केला आहे. ज्यात त्यांनी 'सत्या' सिनेमा पाहताना चित्रपट गृहात सुरू असलेली तुफान मजा मस्ती दाखवण्यात आली आहे. मनोज वाजपेयी यांचा कल्ट क्लासिक चित्रपट 'सत्या' प्रेक्षकांना आजही वेड लावत आहे.

पुण्यातील 'मंगला' थिएटरमध्ये 'सत्या'चित्रपटाचा शो लागला होता. हा शो हाऊसफुल पाहायला मिळाला. चित्रपटात "सपने में मिलती है..." हे गाणे वाजताच प्रेक्षक गाण्याच्या चालीवर थिरकायला लागतात आणि भन्नाट डान्स करताना पाहायला मिळत आहे. संपूर्ण थिएटरमध्ये 'सत्या'चा जयघोष होत आहे.

अभिनेते मनोज बाजपेयी यांनी हा व्हिडीओ शेअर करत एक खास कॅप्शन लिहिलं आहे. त्यांनी लिहिलं की,"26 वर्षांनंतरही 'सत्या' अजूनही चित्रपटगृहात प्रेक्षकांची मने जिंकत आहे. मोठ्या पडद्यावर हा चित्रपट पाहण्यात काहीतरी जादू आहे. भावना, संगीत, अविस्मरणीय कथाकथन. कधीही जुना होत नाही असा अनुभव आहे." सध्या या व्हिडीओवर चाहत्यांकडून प्रेमाचा वर्षाव होत आहे.

अभिनेता मनोज बाजपेयी यांच्या 'फॅमिली मॅन' ने तर सोशल मीडियावर तुफान प्रेम मिळवले आहे. 'फॅमिली मॅन ३' यावर्षात लवकरच प्रेक्षकांच्या भेटीला येणार आहे. चाहते या सीरिजसाठी प्रचंड उत्सुक आहेत. मनोज बाजपेयी कोणतीही व्यक्तिरेखा खूप छान पद्धतीने साकारतात. त्यांच्या मोठा चाहता वर्ग आहे.