Amitabh Bachchan: मुंबईत खळबळ! बिग बी अमिताभ बच्चन यांचा 'जलसा' बंगला बॉम्बने उडवण्याची धमकी

Amitabh Bachchan: मुंबईत बॉम्बस्फोटाच्या धमक्यांचे सत्र सुरूच आहे. काही दिवसांपूर्वी मुंबई महापालिकेचे कार्यालय तसेच माझगाव, दिंडोशी आणि एस्प्लनेड येथील न्यायालयांमध्ये बॉम्बस्फोट करण्याच्या धमकीचे ई-मेल आले होते.या घटनेनंतर मुंबई पोलिसांसह सुरक्षा यंत्रणा सतर्क झाल्या होत्या. आता पुन्हा एकदा मुंबई उच्च न्यायालयाला बॉम्बने उडवून देण्याची धमकी मिळाल्याने खळबळ उडाली आहे. धक्कादायक बाब म्हणजे, या ई-मेलमध्ये बॉलिवूडचे महानायक अमिताभ बच्चन यांचाही जलसा या बंगल्याला टार्गेट करण्यात आले आहे.

अमिताभ बच्चन यांचा 'जलसा' बंगल्याला टार्गेट

मिळालेल्या माहितीनुसार, मुंबई उच्च न्यायालयात बॉम्बस्फोट करण्याची धमकी देणारा ई-मेल पाठवण्यात आला आहे. या मेलमुळे न्यायालय परिसरातील सुरक्षा व्यवस्थेबाबत चिंता निर्माण झाली आहे. धमकीचा ई-मेल मिळताच संबंधित यंत्रणांना याची माहिती देण्यात आली. त्यानंतर पोलिसांनी तातडीने हालचाली सुरू केल्या आहेत.यामध्ये बॉम्बे हायकोर्ट, बॉम्बे स्टॉक एक्सचेंज (BSE), वरळी रेसकोर्स आणि बॉलिवूड अभिनेते अमिताभ बच्चन यांच्या जुहू येथील 'जलसा' बंगल्याचा समावेश आहे.

बॉम्बशोधक पथकाकडून तपासणी सुरू

धमकी मिळाल्यानंतर बॉम्बशोधक आणि नाशक पथकाकडून न्यायालय परिसरात तपासणी सुरू करण्यात आली आहे. पोलिसांकडून परिसराची पाहणी केली जात असून, धमकीच्या ई-मेलचा स्रोत शोधण्याचे प्रयत्न सुरू आहेत. तसेच हा ई-मेल कोणी आणि कोणत्या उद्देशाने पाठवला, याचाही तपास केला जात आहे.

काही दिवसांपूर्वीही मिळाल्या होत्या धमक्या

दरम्यान, काही दिवसांपूर्वीच मुंबईतील महापालिकेच्या कार्यालयासह माझगाव, दिंडोशी आणि एस्प्लनेड येथील न्यायालयांना बॉम्बस्फोटाच्या धमकीचे ई-मेल आले होते. या धमक्यांनंतर पोलिसांनी संबंधित ठिकाणी तपासणी केली होती. आता आठवडाभरातचं पुन्हा मुंबई उच्च न्यायालयाला धमकी मिळाल्याने सुरक्षा यंत्रणांसमोर मोठे आव्हान निर्माण झाले आहे.