Crime : सोडचिठ्ठी न देता पत्नी दुसरं लग्न करायला निघाली, पतीने टोकाचे पाऊल उचलले, पोलीस स्टेशनसमोरच पेट्रोल ओतून...

रणजीत माजगावकर

कोल्हापूर / इचलकरंजी : पत्नी सोडचिठ्ठी न देताच दुसरा विवाह करत असल्यानं इचलकरंजीतील शिवाजीनगर पोलीस ठाणे आवारात इसमानं अंगावर पेट्रोल ओतून पेटवून घेत आत्मदहनाचा प्रयत्न केला. शेखर गायकवाड असं त्याचं नाव आहे. या घटनेमुळं पोलीस ठाण्यात एकच खळबळ माजली. त्या इसमाची जीव वाचवण्यासाठी सुरु असलेली धावपळ आणि भयभीत झालेल्या पोलिसांसह नागरीकांचे त्याला वाचवण्यासाठी सुरु असलेले प्रयत्न पाहून अनेकांनी अश्‍चर्य व्यक्त केलं. अखेर त्याला आयजीएम रुग्णालयात आणलं. प्राथमिक तपासात 60 टक्के भाजल्याचं निष्पन्न झालं असून त्याला पुढील उपचारासाठी कोल्हापुरातील सीपीआर रुग्णालयात हलवलं आहे.      

सोलापूर जिल्ह्यातील करकंब, अकलुज इथं राहणारा शेखर गायकवाड याची इचलकरंजी सासरवाडी आहे. त्याची पत्नी सद्या सासरवाडीत राहत होती. ती सोडचिठ्ठी होण्यापूर्वीच दुसरा विवाह करून घेत असल्याची माहिती शेखरला मिळाली. त्यामुळं तो सासरवाडी येऊन तिचा दुसरा विवाह करण्यास विरोध करत होता. यातून त्यांच्यात भांडण झालं. त्यामुळं शेखरनं थेट शिवाजीनगर पोलीस ठाणे गाठलं. पोलिसांसमोर त्यानं आपली कैफीयत मांडली. पोलिसांनी धीर धरण्याचा सल्ला दिला मात्र त्यानं अचानक पोलीस ठाणे आवारातच अंगावर पेट्रोल ओतून पेटवून घेतलं. बघता बघता अंगावरील कपडे पेटल्यानं जीव वाचवण्याच्या आकांतानं तो सैरभैर पळु लागला.

वाचवा, वाचवा म्हणत त्यानं पोलीस ठाण्यातही प्रवेश केला. यावेळी पोलीस आणि नागरीकांनी त्याच्या अंगावर माती टाकून पाण्यात उडी घेण्याचा सल्ला दिला. तरीही त्यानं पेटलेल्या स्थिती पोलीस गाडीत शिरण्याचा प्रयत्न केला. यावेळी काहींनी स्वत:चे कपडे काढून त्याला लागलेली आग विझवण्याचा प्रयत्न केला तर पोलीस ठाण्यासमोरील घरातून चादर आणून त्याच्या अंगावर टाकली. त्यामुळं आग आटोक्यात आली मात्र या घटनेमुळं पोलीस आणि परिसरातील नागरीकही भयभीत झाले होते. अखेर त्याला पोलीस गाडीत आयजीएम रुग्णालयात आणलं.

प्राथमिक उपचारात 60 टक्के भाजल्याचं स्पष्ट झालं. त्यामुळं त्याला पुढील उपचारासाठी कोल्हापुरातील सीपीआर रुग्णालयात पाठवण्याचा निर्णंय झाला. मात्र पत्नी किंवा सासरवडीतील नातेवाईक आल्याशिवाय पुढील उपचार न घेण्यासाठी आरडाओरडा सुरु केला. अखेर त्याला पोलिसांनी सीपीआर रुग्णालयाकडं नेलं.